Milli Şuranın rəhbər şəxslərindən biri olan Gültəkin Hacıbəylinin Türkiyədən son paylaşımı maraq doğurub. O, sosial şəbəkədə yerləşdirdiyi son mesajında belə yazıb:
“Bu da Türkiyədə 2 illik oturma iznim. Yazıqlar olsun!”
Bu paylaşım onun vəziyyəti ilə bağlı əlavə suallar yaradıb. Gültəkin Hacıbəyli bu paylaşımda “2 illik oturma icazəsi” olduğunu göstərən sənədin fotosunu yaymalı idi. Lakin göründüyü üzrə, o, bunu etməyib, yalnız qısa mətn yazmaqla kifayətlənib. Bu da sual doğurur - buna imkan verilməyibmi, yoxsa, onun belə bir sənədi yoxdurmu?
Xatırladaq ki, Gültəkin Hacıbəyli sentyabr ayında – Ramiz Mehdiyevin ev dustaqlığına məhkum edildiyi günün ertəsi – gözlənilmədən Azərbaycandan çıxaraq Türkiyəyə getmişdi. O dövrdə “qaçmaq” iddialarını təkzib edərək oğlunun yanına getdiyini bildirmişdi. Son iki ay Türkiyədə qalmasına baxmayaraq, onun barəsində davam edən istintaq prosesi fonunda vəziyyət kəskin dəyişib.
Hazırda əsas versiya budur:
Azərbaycan istintaq orqanlarının sorğusu əsasında Gültəkin Hacıbəyli Türkiyə ərazisində saxlanılıb və ifadə verməsi üçün onun Bakıya gətirilməsi nəzərdən keçirilir.
Bununla belə, Gültəkin Hacıbəylinin Azərbaycana ekstradisiya olunub-olunmayacağı barədə rəsmi məlumat hələlik yoxdur. Lakin prosesin sürətləndiyi bildirilir.
Qeyd edək ki, Gültəkin Hacıbəyli Ramiz Mehdiyev işi üzrə aparılan geniş istintaqın potensial fiqurlarından biri kimi göstərilir. AXCP funksionerləri Əli Kərimli və Məmməd İbrahim də daxil olmaqla, bir çox şəxsin ifadələrinin alındığı bu prosesin gündən-günə daha da genişlənəcəyi ehtimal olunur.
