Noyabrın 28-də Rəşid Behbudov adına Azərbaycan Dövlət Mahnı Teatrında neon estetikasında hazırlanmış “Bir dəniz hekayəsi” adlı tamaşa nümayiş olunub.
Teatrdan verilən məlumatda bildirilir ki, tamaşa yeni mövsüm layihələri çərçivəsində təqdim edilib. Yaradıcı komandanın məqsədi Mahnı Teatrının təcrübəsinə yeni nəfəs gətirməkdir.
“Bir dəniz hekayəsi” həm ritmə və rəqsə, həm də hekayəyə söykənən vizual-poetik təqdimat formatı ilə seçilir. Musiqili tamaşada neon işıqlandırma, dinamik səhnə təsvirləri və dəniz atmosferi ilə birlikdə parlaq rəng axınları bir-birini tamamlayaraq, fərqli vizual görüntü yaradıb.
Tamaşaçılar dalğaların ritmini, suyun axışını və hərəkətin enerjisini hiss edərək səhnə işini böyük rəğbətlə qarşılayıblar.
Layihənin rəhbəri Ülviyyə Bəbirli, quruluşçu rejissor Təhminə Hümbətova, rəssamlar Elmira Fariz və Rəvan Kərimi, musiqi tərtibatçısı Əli Cəfərzadədir.
Səhnədə Zaur Əliyev, Diana Xozino, Samirə Əlləkbərova və İlahə Əlizadə çıxış ediblər.
“Bir dəniz hekayəsi” neon tamaşasının videosu bu linkdə.
