Effektiv hesab edilən “3-3-3” metodu yuxusuzluğu adi, qısamüddətli yuxu pozuntularından ayırmağa imkan verir.
Editor.az xəbər verir ki, İngiltərənin Charing Cross xəstəxanasının anestezioloqu Sunny Nighy bu barədə HuffPost-a danışıb.
Həkimin sözlərinə görə, yuxu pozuntuları həftədə ən azı üç dəfə təkrarlanırsa, minimum üç ay davam edirsə və insanın gündüz fəaliyyətinin üç əsas aspektinə, məsələn, yorğunluq, diqqət dağınıqlığı və ya əhval dəyişikliklərinə təsir edirsə, bu hal artıq yuxusuzluq kimi qiymətləndirilə bilər. Nighy qeyd edib ki, belə vəziyyətlər sadəcə pis həyat tərzi ilə bağlı olmaya bilər və əlavə tibbi diqqət tələb edir.
Mütəxəssis bildirib ki, yuxusuzluq yalnız yuxuya getməkdə çətinliklə məhdudlaşmır. Simptomlara əhvalın tez-tez dəyişməsi, konsentrasiyanın zəifləməsi və keyfiyyətsiz yuxu nəticəsində məhsuldarlığın azalması da daxildir. Onun sözlərinə görə, stress, spirtli içki qəbulu, eləcə də yatılan mühitin əlverişsiz olması problemin ən geniş yayılmış səbəbləridir.
Həkim riski azaltmaq üçün müntəzəm fiziki fəaliyyət, stabil gündəlik rejim, yataq otağında qaranlıq, sərin və sakit şəraitin yaradılması, eləcə də rahat yataq dəstlərinin seçilməsini tövsiyə edib.
// Gülnarə Abasova, Editor.az
