Xəzər Rayon Məhkəməsində xuliqanlıqda təqsirləndirilən Qurban Əsədovun (adı, soyadı şərtidir) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Ramilə Xəzrinin sədrliyi ilə keçirilən prosesdə hökm oxunub.
Məhkəmənin hökmü ilə ona 800 manat miqdarında cərimə cəzası təyin edilib.
İttihama görə, hadisə 15 mart 2025-ci il tarixində, saat 14:28 radələrində Bakı şəhəri, Xəzər rayonu, Buzovna qəsəbəsində qeydə alınıb.
Belə ki, Qurban Əsədovun həyat yoldaşı “Opel Astra” markalı avtomobildən düşüb yolun əks istiqamətinə keçərkən həmin küçə ilə hərəkətdə olan zərərçəkmiş Uğur Tahirov (adı, soyadı şərtidir) idarə etdiyi “Toyota Corolla” markalı maşının sol yan hissəsi ilə qadını vurub. Hadisədən sonra təqsirləndirilən şəxs sürücü, zərərçəkmişə yüksək sürətlə hərəkət etməsi barədə irad bildirib, uca səslə onu təhqir edib və söyməklə zor tətbiq edib. Ardınca Qurban təpiklə onun avtomobilinin sol qapısına dəfələrlə zərbə vuraraq əzib zədələyib, daha sonra maşının açıq pəncərəsindən istifadə edərək yumruqla sürücünün sol qol nahiyəsinə zərbələr vurub, köynəyini cırıb.
Baş verənlər nəticəsində təqsirləndirilən şəxs digər şəxslərin gözü qarşısında ictimai qaydanı kobud şəkildə pozub, cəmiyyətə açıqca hörmətsizlik nümayiş etdirib, zərərçəkmiş şəxsə xəsarət yetirib.
Bundan başqa, Qurbanın qəsdən zərbələri nəticəsində avtomobilin sol qapısının əzilməsi ilə 630 manat, sürücünün əynində olan qara rəngli gödəkçənin sol yaxa hissəsinin cırılması ilə isə 40 manat olmaqla ümumilikdə 670 manat maddi ziyan vurulub.
Kamal Məmmədov
