...ABŞ Prezidenti Donald Tramp administrasiyasının xarici siyasət prioritetlərini müəyyən edən yeni Milli Təhlükəsizlik Strategiyasını açıqladı. Əsas diqqət miqrasiya, narkotik qaçaqmalçılığı və rəqib güclərin artan təsirinə qarşı mübarizə aparmaq üçün ABŞ-ın Qərb yarımkürəsindəki hərbi mövcudluğunun gücləndirilməsinə yönəldilib.
SİA-nın əldə etdiyi məlumata görə, bu barədə Politico yazır.Ağ Ev tərəfindən cümə axşamı yayımlanan 33 səhifəlik sənəddə sərhəd təhlükəsizliyi "milli təhlükəsizliyin əsas elementi" adlandırılır və Monro Doktrinasının yenilənmiş təfsiri olan "Tramp Doktrinası" təqdim olunur.
ABŞ Latın Amerikasında, Karib dənizində və sərhədləri yaxınlığında xarici güclərin, o cümlədən limanların, hərbi qurğuların və strateji infrastrukturun nəzarətinin qarşısını almaq niyyətindədir.
Dəniz yollarına nəzarət etmək və qanunsuz miqrasiya və narkotik qaçaqmalçılığı ilə mübarizə aparmaq üçün ABŞ Hərbi Dəniz Qüvvələrinin və Sahil Mühafizəsinin mövcudluğunun gücləndirilməsinə xüsusi diqqət yetirilir.
Həmçinin, nadir torpaq metalları da daxil olmaqla, strateji ehtiyatların hasilatında Latın Amerikası ölkələri ilə daha fəal əməkdaşlıq etmək planları açıqlanıb.
Strategiya Çini uzunmüddətli iqtisadi rəqib kimi müəyyən edir.
Eyni zamanda, ABŞ "qarşılıqlı və ədalətli" prinsiplərə tabe olaraq "qarşılıqlı faydalı ticarət münasibətlərini" qorumaq niyyətində olduğunu bəyan edir.
ABŞ həmçinin Tayvanla bağlı əvvəlki mövqeyini bir daha təsdiqləyir: Vaşinqton status-kvonun birtərəfli şəkildə dəyişdirilməsini dəstəkləmir. Ukrayna ilə bağlı sənəddə hərbi əməliyyatların tez bir zamanda dayandırılması tələb olunur, lakin Rusiyaya qarşı tənqidlər minimaldır.
Strategiya Avropadakı vəziyyətə daha sərt baxış bucağından yanaşır və demokratiyaya təhdidlər, miqrasiya riskləri və "sivilizasiya böhranı" kimi amilləri qeyd edir.
Tramp sənədi "Amerikanın böyüklüyünü qorumaq üçün yol xəritəsi" adlandırdı və onun ənənəvi dəyərlərə sadiqliyini vurğuladı.
Əli Babayev
