“Komandama inanıram. Sabahkı görüşü səbirsizliklə gözləyirik”.
İdmanxeber.az xəbər verir ki, bu sözləri Niderlandın “Ayaks” komandasının baş məşqçisi Fred Qrim UEFA Çempionlar Liqasının liqa mərhələsinin VI turunda Bakıda “Qarabağ”a qarşı keçirəcəkləri oyun barədə danışarkən deyib.
Baş məşqçi “Qarabağ”ın matçlarına baxdığını, Ağdam təmsilçisinin balanslı komanda olduğunu söyləyib
“Onlar ildən-ilə inkişaf edirlər. “Qarabağ”ın yaxşı müdafiəçiləri var. Onlar orta sahədə də uğurlu oyun qura bilirlər. Xalımız olmasa da, rəqibdən çəkinmirik. Komanda olaraq daha da inkişaf etmək istəyirik. Çempionlar Liqasında xalımızın olmaması pis nəticədir. Bakıdan uğurlu nəticə ilə qayıtmaq niyyətindəyik”, – deyə Fred Qrim vurğulayıb.
Qeyd edək ki, dekabrın 10-da Tofiq Bəhramov adına Respublika Stadionunda təşkil olunacaq “Qarabağ” – “Ayaks” görüşü saat 21:45-də başlayacaq.
