Ukrayna “Lukoil” şirkətinin Xəzər dənizindəki “Filanovski” neft yatağına hücum edib.
APA xəbər verir ki, bu barədə “Bloomberg” məlumat yayıb.
Agentliyə danışan anonim mənbə bildirib ki, Ukraynanın uzaqmənzilli dronları platformaya ən azı dörd dəfə zərbə endirib və yataqdakı 20-dən çox quyuda hasilat dayandırılıb.
Şirkətin məlumatına görə, Xəzər dənizinin Rusiya hissəsindəki “Filanovski” yatağının layihə istehsal gücü ildə 6 milyon tondur. Bu, gündə təxminən 120 min barelə bərabərdir. Keçən il “Lukoil” şirkətinin Rusiyadakı xam neft və kondensat istehsalı təxminən 76,5 milyon tona çatıb. Bu o deməkdir ki, “Filanovski” yatağı şirkətin ümumi daxili istehsalının 8%-dən azını təşkil edir.
***
12:08
Ukrayna ordusunun pilotsuz uçuş aparatlarının zərbələri nəticəsində Rusiyanın Xəzər dənizi sektorunda neft hasil edən platformanın işini dayanıb.
APA xəbər verir ki, bu barədə “RBC-Ukrayna” ordudakı mənbələrinə istinadən məlumat yayıb.
Mənbələrin məlumatına görə, Ukraynanın Təhlükəsizlik Xidmətinin uzaqmənzilli dronları “Lukoil-Nijnevoljskneft” şirkətinə məxsus “Filanovski” adına neft platformasına zərbə endirib.
Qeyd olunur ki, bu, Ukraynanın Xəzər dənizində Rusiya neft hasilatı infrastrukturuna endirdiyi ilk zərbədir.
Məlumata görə, dəniz platformasına azı dörd dəfə dəqiq zərbə endirilməsi qeydə alınıb. Hücum nəticəsində platformanın xidmət göstərdiyi 20-dən çox quyudan neft və qaz hasilatı dayandırılıb.
Bildirilir ki, “Filanovski” adına yataq Xəzərin Rusiya sektorunda kəşf edilmiş ən iri yataqlardan biridir. Onun ehtiyatları 129 milyon ton neft və 30 milyard kubmetr qaz təşkil edir. Hasil olunan məhsul Xəzər Boru Kəməri Konsorsiumu vasitəsilə xaricə ixrac olunur.
