ain.az, Qaynarinfo portalına istinadən məlumatı açıqlayır.
"Eli Lilly” şirkətinin cümə axşamı yaydığı açıqlamaya əsasən, irəliləmiş mərhələdə aparılan klinik sınaqlarda şirkətin yeni nəsil GLP-1 piylənmə dərmanı olan "Retatrutide" digər arıqlama preparatları ilə müqayisədə daha çox çəki itirilməsinə səbəb olub.
Qaynarinfo-nun xarici mətbuata istinadla verdiyi xəbərə görə, həftədə bir dəfə qəbul edilən bu dərmanın ən yüksək dozasını 68 həftə ərzində alan pasiyentlər klinik sınaqların üçüncü mərhələsinin sonunda orta hesabla 32,3 kiloqram çəki itiriblər.
Sınaq zamanı 12 milliqram doza qəbul edən iştirakçılar bədən çəkilərinin orta hesabla 28,7 faizini itiriblər. Bu göstərici "Zepbound” və rəqib "Novo Nordisk”in "Wegovy” dərmanları ilə əldə ediləndən daha yüksək olub. İştirakçıların 23 faizindən çoxu isə ilkin çəkilərinin ən azı 35 faizini itirib. Hazırda Zepbound, Wegovy və Ozempic bazarda ən çox istifadə olunan arıqlama dərmanları sırasında yer alır.
"Eli Lilly” retatrutide qəbul edən xəstələrin 12 faizindən çoxunun kəskin çəki itkisi və digər yan təsirlər səbəbilə müalicəni dayandırdığını bildirib. Eyni zamanda, dərmanın ən yüksək dozasını qəbul edənlərin 20 faizindən çoxunda dəriyə toxunduqda ağrıya səbəb olan narahatlıq müşahidə edilib. Bununla belə, yan təsirlərin əksəriyyəti artıq bazarda olan digər arıqlama dərmanlarının təsirləri ilə uyğunluq təşkil edir.
Dərmanın təsiri yalnız arıqlama ilə məhdudlaşmayıb. Şirkətə görə, "Retatrutide" artrit səbəbilə yaranan diz ağrılarını orta hesabla 75,8 faiz azaldıb və pasiyentlərin fiziki fəaliyyətini əhəmiyyətli dərəcədə yaxşılaşdırıb.
Piylənmə və diz oynağı artriti olan 445 iştirakçının 1/8-i 68 həftənin sonunda diz ağrılarından tamamilə xilas olub. Bu qrupda nisbətən aşağı doza qəbul edənlər üstünlük təşkil edib.
ABŞ-ın Corciya ştatındakı "Northside” xəstəxanasının məlumatına görə, diz artriti 45 yaşdan yuxarı amerikalıların təxminən 20 faizini təsir edir və bu problem piylənmədən əziyyət çəkən insanlarda daha çox müşahidə olunur.
"Eli Lilly and Company”nin vitse-prezidenti və "Lilly Cardiometabolic Health” bölməsinin rəhbəri Kennet Kaster qeyd edib ki, 2026-cı ildə yeddi ayrı Faza 3 hesabatının nəticələri gözlənildiyindən, "Retatrutide" dərmanının ciddi çəki itkisinə ehtiyac duyan və diz osteoartriti kimi ağırlaşmalardan əziyyət çəkən xəstələr üçün mühüm seçimə çevriləcəyi ehtimal olunur.
Şirkət əlavə edib ki, dərman ürək-damar riski ilə bağlı tanınmış biogöstəriciləri azaldıb və sistolik qan təzyiqini 14 millimetr civə qədər endirib. Qeyd edək ki, sistolik qan təzyiqi ürək döyüntüsü zamanı arteriyalardakı təzyiq səviyyəsini ifadə edir.
Sınaqda test edilmiş 9 və 12 milliqram dozalarla yanaşı, 4 milliqramlıq daha aşağı dozun da öyrəniləcəyi yeni bir araşdırmanın nəticələrinin gələn il açıqlanacağı bildirilir.
"Eli Lilly” həmçinin, əzələ kütləsinin itirilməsinə səbəb olmadan arıqlamağı təmin edəcək yeni bir arıqlama həbi və "amilin analoqu” iynəsini də inkişaf etdirir.
Aydın
Sonrakı hadisələr barədə daha çox məlumat almaq üçün ain.az saytını izləyin.
