Mövcud cəbhə xətti boyunca demilitarizasiya olunmuş zona yaradılması müzakirə edilir...
Poliqon xəbər verir ki, Avropa liderləri Kiyevin təhlükəsizliyinin təmin olunması ilə bağlı konkret planlar üzərində razılaşma əldə etməyə çalışırlar. Politico nəşrinin yazdığına görə, bu planlara hazırkı cəbhə xətti boyunca demilitarizasiya olunmuş zonanın yaradılması, həmçinin Ukrayna ordusunun hazırlanması və mümkün atəşkəsin monitorinqi ilə bağlı öhdəliklər daxildir.
Müzakirələrin gedişi ilə tanış olan bir avropalı rəsminin bildirdiyinə görə, koalisiya qüvvələrinə, ehtimal ki, cəbhə xəttinin müşahidəsi üçün təyyarə və pilotsuz uçuş aparatlarından istifadə etmək tapşırılacaq. Eyni zamanda, qoşunların bir hissəsinin Ukraynanın qərbində yerləşdirilməsi planlaşdırılır. Rəsmi mənbənin sözlərinə görə, bu qüvvələr birbaşa ön xətdə xidmət etməyəcək, əsas məqsəd isə Ukrayna Silahlı Qüvvələrinin bərpasına və gücləndirilməsinə yardım göstərmək olacaq.
Məqalədə qeyd olunur ki, Avropa paytaxtlarında bu cür mexanizmlər mümkün sülh razılaşmasından sonra Ukraynanın təhlükəsizliyinə uzunmüddətli təminat vermək baxımından vacib hesab edilir və hazırda bu məsələlər ətrafında intensiv diplomatik məsləhətləşmələr aparılır.
Poliqon.info
