Alimlər ultraemal olunmuş qidaların insan beyninə mənfi təsir göstərdiyini müəyyən ediblər. Araşdırmalar göstərib ki, bu cür məhsulların tez-tez istehlakı beynin strukturunda dəyişikliklərə səbəb ola bilər. Bu barədə AzPost xarici mediaya istinadla məlumat verir.
Mütəxəssislər təxminən 30 min nəfərin beyin görüntülərini təhlil edərək, ultraemal olunmuş qidalara üstünlük verən şəxslərdə müəyyən struktur dəyişikliklərinin müşahidə edildiyini aşkar ediblər. Bildirilib ki, bu dəyişikliklər iştahın idarə olunmasını çətinləşdirir və həddindən artıq qidalanmaya yol aça bilər.
Araşdırmada qeyd olunur ki, ultraemal olunmuş məhsullar tərkibində çoxlu sənaye əlavələri – emulqatorlar, boyaq maddələri, dadlandırıcılar və konservantlar olan qidalardır. Bu kateqoriyaya şirin qazlı içkilər, çipslər, fastrfud məhsulları, kolbasalar, hazır souslar və uzunmüddətli saxlanma üçün nəzərdə tutulan digər qidalar daxildir.
Tədqiqatın həmmüəllifi, Helsinki Universitetinin nümayəndəsi Arsen Kanyambiva bildirib ki, əldə olunan nəticələr ultraemal olunmuş məhsulların yüksək səviyyədə istehlakının beyində dəyişikliklərlə əlaqəli olduğunu göstərir. Onun sözlərinə görə, bu təsirin əsas səbəbi məhz kimyəvi əlavələrdir.
Eyni zamanda ekspertlər vurğulayıblar ki, bütün emal olunmuş qidalar zərərli hesab edilmir. Dondurulmuş tərəvəzlər, pasterizə edilmiş süd və konservləşdirilmiş balıq kimi məhsullar faydalı ola bilər. Əsas təhlükə isə tərkibində çoxlu əlavələr, şəkər, duz və yağ olan qidalardan qaynaqlanır.
