Qlobal miqyasda şirkətlərin 88 faizi namizədlərin ilkin seçimi üçün süni intellektdən istifadə edir. Araşdırmalara görə, namizədlərin təxminən üçdə ikisi də işə qəbul prosesi zamanı birbaşa və ya dolayı yolla süni intellekt əsaslı alətlərlə qarşılaşır. Mütəxəssislər bu yeni nəsil işə qəbul sistemlərinin namizədlərin cavablarında nələrə diqqət yetirdiyini və müsahibələrə necə hazırlaşmağın vacibliyini izah edirlər.
Artıq “süni intellektlə işə qəbul dövrü” adlandırılan bu mərhələdə həm şirkətlər, həm də namizədlər texnologiyaya daha çox güvənməyə başlayıblar. Bununla yanaşı, bu proses birtərəfli video müsahibələr, eləcə də çatbotlar vasitəsilə aparılan qiymətləndirmələri də əhatə edir. Bu zaman namizədlər bir insan deyil, alqoritm tərəfindən dəyərləndirilir.
Mütəxəssislərin fikrincə, qarşı tərəfdə real insanın olmaması bir çox namizəd üçün əlavə gərginlik yaradır. Vizual və ya şifahi rəyin verilmədiyi bu “rəy boşluğu” müsahibə prosesini daha çətin edə bilər. Uğur qazanmaq üçün isə aşağıdakı tövsiyələr önə çıxır:
Enerji səviyyəsini yüksək saxlayın: Qarşınızda insan olmasa belə, rola maraq və motivasiya nümayiş etdirmək vacibdir.
Əvvəlcədən hazırlaşın: Müsahibə suallarına məşq etmək həyəcanın və aşağı enerji səviyyəsinin qarşısını alır.
Göz təmasını qoruyun: Qeydlərə tez-tez baxmaq süni intellekt tərəfindən mənfi dəyərləndirilə bilər. Kameranın yanına tanıdığınız birinin şəkilini yerləşdirmək göz kontaktını saxlamağa kömək edə bilər.
Süni intellekt əsaslı çatbotlar namizədlərin cavablarını CV analizi kimi təhlil edir. Bu sistemlər təkcə açar sözləri deyil, həm də istifadə olunan dilin müsbət və ya mənfi tonunu nəzərə alır. Məsələn, əvvəlki işəgötürənlər haqqında mənfi fikirlər bildirən namizədlər daha aşağı bal ala bilərlər.
Mütəxəssislər qısa “bəli” və ya “xeyr” cavabları əvəzinə, bacarıq və təcrübəni ön plana çıxaran, açar sözlərlə zəngin və ətraflı cavablar verməyi tövsiyə edirlər.
Süni intellekt strukturlaşdırılmış və aydın cavabları daha rahat təhlil edir. Bu səbəbdən müsahibələr zamanı “STAR” (Vəziyyət, Tapşırıq, Fəaliyyət, Nəticə) metodundan istifadə etmək mühüm üstünlük sayılır. Namizədlərdən yalnız vəzifələrini deyil, əldə etdikləri nəticələri də konkret şəkildə izah etmələri gözlənilir.
Müsahibədən sonra sistem dürüstlük, ünsiyyət bacarıqları və liderlik kimi meyarlar əsasında qiymətləndirmə hesabatı hazırlayır. İşəgötürənlər bəzən bütün müsahibəni izləmək əvəzinə, yalnız süni intellektin seçdiyi qısa video hissələrə və ya hesabat xülasələrinə baxırlar.
Mütəxəssislər bildirirlər ki, ilkin təəssüratlar artıq rəqəmsal sistemlər tərəfindən formalaşdırılır. Eyni zamanda, süni intellektin vurğu və mədəni fərqlərə görə qərəzli ola biləcəyi riski də istisna edilmir.
Nəticə etibarilə, son qərarı hələ də insanlar versə də, süni intellekt filtrlərindən uğurla keçmək müasir işə qəbul prosesinin ən vacib mərhələlərindən birinə çevrilib.
