Yaponiya hakimiyyəti Fukuşima fəlakətindən sonra on ildən artıq müddətdə fəaliyyətsiz qalan, dünyanın ən böyük atom elektrik stansiyasını yenidən işə salmaq qərarına gəlib.
Bu addım ölkənin enerji təminatını fosil yanacaqlardan uzaqlaşdırmaq strategiyasında mühüm dönüş nöqtəsi kimi qiymətləndirilir.
"Cebheinfo.az" xəbər verir ki, bir çox yerli sakinlərin narahatlığına baxmayaraq, Kaşivazaki-Kariva stansiyasına ev sahibliyi edən Niiqata əyalət məclisi bazar ertəsi günü operator şirkət olan “Tokyo Electric Power Company”-yə (TEPCO) yeddi reaktordan birini yenidən işə salmağa icazə verən qanun layihəsini təsdiqləyib. Yaponiyanın ictimai yayımçısı NHK-nin məlumatına görə, şirkət 6-cı reaktoru təxminən 20 yanvar tarixində yenidən işə salmağı planlaşdırır.
Xatırladaq ki, Yaponiya 2011-ci ildə baş verən 9.0 bal gücündə zəlzələ və sunaminin Fukuşima Daiiçi stansiyasında yaratdığı nüvə əriməsindən sonra nüvə enerjisinə qarşı son dərəcə ehtiyatlı mövqe sərgiləyirdi. 1986-cı ildəki Çernobildən sonra dünyanın ən ağır nüvə fəlakəti hesab edilən bu hadisədən sonra Yaponiya Kaşivazaki-Kariva da daxil olmaqla 54 nüvə stansiyasının hamısını bağlamışdı.
Dünya Nüvə Assosiasiyasının məlumatına görə, həmin vaxtdan bəri işlək vəziyyətdə olan 33 reaktordan yalnız 14-ü yenidən fəaliyyətə başlayıb. Niiqatadakı bu stansiya isə Fukuşima stansiyasını da idarə edən və həmin dövrdə ciddi tənqidlərə məruz qalan TEPCO tərəfindən yenidən işə salınan ilk obyekt olacaq.
