OpenAI başda olmaqla süni intellekt sahəsindəki rəqiblərindən daha geniş miqyasda məlumatlara çıxış imkanı əldə edən Google, məlumat mənbələrinin çoxluğu sayəsində süni intellekt tədqiqatlarında üstünlük qazanır.
Texnologiya şirkətlərinin məlumat gücü süni intellektdəki uğurlarına birbaşa təsir göstərir. Məlumat müxtəlifliyi süni intellekt modellərinin mürəkkəb tapşırıqlarda daha yaxşı nəticələr verməsinə imkan yaradır.
Ən çox istifadəçiyə OpenAI-nin ChatGPT modeli sahib olsa da, ABŞ mərkəzli texnologiya nəhəngi Google Gemini adlı süni intellekt modeli ilə bu sahədə önə çıxır.
ABŞ mərkəzli rəqəmsal bazar araşdırma şirkəti Sensor Tower-ın məlumatına görə, Google Gemini son aylarda yüklənmə sayında artım, aylıq aktiv istifadəçi böyüməsi və tətbiqdə keçən vaxt baxımından ChatGPT-ni geridə qoymağa başlayıb.
İnternet tarixində mühüm yer tutan axtarış motoru Google illər ərzində müxtəlif texnologiyalara sərmayə qoyaraq xidmətlərini şaxələndirib. YouTube-dan Android əməliyyat sisteminə qədər bir çox platformanı özündə birləşdirən şirkət, axtarış motoru botları vasitəsilə dünyadakı saytları siyahıya alaraq əhəmiyyətli məlumat bazasına sahibdir.
Məlumat sahəsindəki üstünlük Google-a süni intellekt texnologiyalarının inkişafı prosesində ciddi üstünlük qazandırsa da, bu, texnologiyada inhisarçılıq ilə bağlı müzakirələri də gündəmə gətirir.
ABŞ-ın aparıcı texnologiya şirkətlərindən Cloudflare-in baş icraçı direktoru (CEO) Metyu Prins, ABŞ mərkəzli texnologiya və mədəniyyət jurnalı Wired-a verdiyi müsahibədə internetin tarixinə baxıldıqda xüsusilə son 27 ildə Google-ın ən böyük oyunçu olduğunu bildirib.
Prins izah edib ki, Google internet saytlarına gedən trafikdən gəlir əldə etmək üçün bütün vasitələri inkişaf etdirib və son 27 ildə internetin formalaşmasında mühüm rol oynayıb.
Prince əlavə edib ki, Google bu gün süni intellekt sahəsində də önə çıxır: “Google axtarış robotunu süni intellekt robotu ilə birləşdirdi və ən böyük çətinliyi yaratdı. OpenAI-dan 3,2 dəfə, Microsoft-dan 4,6 dəfə, Anthropic və Meta-dan isə 4,8 dəfə daha çox səhifə görürlər. Həqiqətən inanılmaz bir imtiyaza sahibdirlər”.
Google-ın digər platformalara nisbətən daha çox məlumat əldə etməsinə dair Prins bildirib: “Gemini-nin OpenAI-dan niyə daha yaxşı olduğunu soruşduqda, cavab onların daha çox məlumat sahibi olmasıdır. Bu, çiplərlə, tədqiqatla və ya texnologiya ilə bağlı deyil”.
Prins həmçinin vurğulayıb ki, Google internetdə irəliləməni əngəlləyən şirkətdir və istifadəçilərin məlumatlarını qorumaq üçün Məzmun Müstəqilliyi Gününü elan etdiklərini qeyd edib. Bu çərçivədə süni intellektin məlumatlarını almaq istəməyən istifadəçilərə pulsuz alətlər təqdim edilib və 400 milyarddan çox süni intellekt sorğusunun məlumatlarının alınması qarşısı alınıb.
