BAKI, 23 dekabr. TELEQRAF
“Müasir dünya mürəkkəb geosiyasi çağırışlar, sürətlə dəyişən beynəlxalq münasibətlər sistemi və qlobal risklərlə xarakterizə olunur. Belə bir şəraitdə dövlətlərin dayanıqlı inkişafı, milli maraqların etibarlı qorunması və uzunmüddətli strateji hədəflərin reallaşdırılması güclü siyasi iradə, çevik idarəçilik və uzaqgörən liderlik tələb edir. Azərbaycan məhz bu prinsiplərə əsaslanan dövlət siyasəti sayəsində regionda və beynəlxalq müstəvidə mövqelərini möhkəmləndirərək yeni inkişaf mərhələsinə qədəm qoyub”.
Teleqraf xəbər verir ki, bu fikirləri Milli Məclisin deputatı Siyavuş Novruzov açıqlamasında deyib.
O bildirib ki, 2025-ci il müasir Azərbaycan dövlətçiliyinin formalaşmasında, Zəfərdən sonrakı inkişaf strategiyasının dərinləşdirilməsində və gələcəyə hesablanmış siyasətin praktik nəticələrində mühüm mərhələ kimi yadda qalıb: “Bu il Prezident İlham Əliyevin rəhbərliyi altında həyata keçirilən ardıcıl islahatlar, strateji təşəbbüslər və qlobal miqyaslı fəaliyyət ölkənin ümumi inkişaf mənzərəsini daha da aydın şəkildə nümayiş etdirib”.
Siyavuş Novruzov vurğulayıb ki, Prezident İlham Əliyevin peşəkar dövlət xadimi kimi formalaşması çoxşaxəli idarəçilik təcrübəsinə, dərin siyasi biliyə və qlobal prosesləri düzgün qiymətləndirmək bacarığına əsaslanır: “Onun fəaliyyəti Azərbaycanı dünyada tanınmış, söz sahibi olan və mövqeyi nəzərə alınan dövlətə çevirib. Bu gün Prezident İlham Əliyev beynəlxalq münasibətlər sistemində nüfuzlu lider, prinsipial mövqe sərgiləyən və ədalətli yanaşmanı müdafiə edən dövlət başçısı kimi qəbul olunur.
Azərbaycanın beynəlxalq təşkilatlarda - BMT, Qoşulmama Hərəkatı, İslam Əməkdaşlıq Təşkilatı, Türk Dövlətləri Təşkilatı və digər platformalarda fəal iştirakı Prezident İlham Əliyevin diplomatik xəttinin səmərəliliyinin göstəricisidir. Xüsusilə, Qoşulmama Hərəkatına uğurlu sədrliyi təşkilatın beynəlxalq nüfuzunu əhəmiyyətli dərəcədə artırıb.
Prezident İlham Əliyevin siyasi xəttinin əsas dayaqlarından biri də xalq-dövlət birliyidir. Azərbaycan xalqı hər zaman dövlət başçısının həyata keçirdiyi siyasəti dəstəkləyib, bu dəstək taleyüklü tarixi mərhələlərdə xüsusi əhəmiyyət kəsb edib. Xalqın iradəsinə əsaslanan siyasi legitimlik dövlətin gücünü və davamlılığını təmin edən başlıca amildir. “Qalib xalqın qalib lideri” anlayışı yalnız simvolik ifadə deyil, real siyasi və tarixi reallığın təsviridir. Bu birlik Azərbaycan dövlətinin ən böyük strateji üstünlüyüdür”.
Deputat qeyd edib ki, 2025-ci il Prezident İlham Əliyevin müəyyən etdiyi uzunmüddətli inkişaf xəttinin ardıcıl icrası baxımından əlamətdar olub. Onun sözlərinə görə, “Azərbaycan 2030: sosial-iqtisadi inkişafa dair Milli Prioritetlər” və “2022-2026-cı illərdə sosial-iqtisadi inkişaf Strategiyası” çərçivəsində müəyyən edilmiş hədəflər bu il də real nəticələrlə müşayiət olunub:
“İqtisadiyyatın şaxələndirilməsi, qeyri-neft sektorunun genişləndirilməsi, regionların sosial-iqtisadi inkişafı, infrastruktur layihələrinin icrası və insan kapitalına yönəlmiş proqramlar 2025-ci ilin əsas məzmununu təşkil edib. Sosial rifahın yüksəldilməsi və milli-mənəvi dəyərlərin qorunması dövlət siyasətinin prioriteti olaraq qalmaqda davam edib.
Onu qeyd edək ki, Prezident İlham Əliyev Yeni Azərbaycan Partiyasının sədri kimi ölkədə siyasi sabitliyin qorunmasına, institusional inkişafın gücləndirilməsinə və dövlət idarəçiliyində çevikliyin təmin olunmasına xüsusi önəm verir. Partiyanın fəaliyyəti dövlətçilik maraqları ilə siyasi məsuliyyətin vəhdətinə əsaslanır. Eyni zamanda Prezident İlham Əliyevin təşəbbüsləri ümumbəşəri humanizm dəyərlərinə sadiqliyi, insan hüquqlarının qorunması və sosial həssas qruplara dəstəyin gücləndirilməsi ilə səciyyələnir”.
Siyavuş Novruzov bildirib ki, Prezident İlham Əliyevin həyata keçirdiyi praqmatik xarici siyasət Azərbaycanın beynəlxalq münasibətlər sistemində etibarlı və proqnozlaşdırılan tərəfdaş imici qazanmasını təmin edib. Enerji təhlükəsizliyi, nəqliyyat-logistika dəhlizləri və regional əməkdaşlıq sahəsində həyata keçirilən təşəbbüslər ölkəmizin strateji əhəmiyyətini daha da artırıb.
Türk dövlətləri ilə münasibətlərin möhkəmləndirilməsi Azərbaycanın xarici siyasətinin əsas prioritetlərindən biri olaraq regional inteqrasiyanın güclənməsinə xidmət edir. Azərbaycan İslam Əməkdaşlıq Təşkilatının ən aktiv və nüfuzlu üzvlərindən biri kimi islam həmrəyliyinin möhkəmlənməsinə mühüm töhfələr verir.
Azərbaycanın COP29-a ev sahibliyi etməsi Prezident İlham Əliyevin qlobal çağırışlara məsuliyyətli yanaşmasının və beynəlxalq etimadın göstəricisidir. Bu hadisə iqlim diplomatiyasında yeni mərhələnin başlanğıcı kimi qiymətləndirilir və Azərbaycanın qlobal gündəlikdə rolunu daha da gücləndirir”.
Deputat əlavə edib ki, Ümummilli lider Heydər Əliyevin əsasını qoyduğu güclü ordu quruculuğu Prezident İlham Əliyevin rəhbərliyi altında məntiqi zirvəsinə çatıb: “Müzəffər Ali Baş Komandanın rəhbərliyi ilə Azərbaycan Silahlı Qüvvələri 44 günlük Vətən müharibəsində tarixi Qələbə qazanaraq ölkəmizin ərazi bütövlüyünü təmin edib. Antiterror əməliyyatı nəticəsində Azərbaycanın dövlət suverenliyi tam bərpa edilib, yeni təhlükəsizlik reallıqları formalaşıb. Qələbə diplomatiyası regionda uzunmüddətli sülhün əsasını qoyub.
2025-ci il Qarabağ və Şərqi Zəngəzurun bərpası və yenidən qurulması baxımından da əlamətdar olub. Genişmiqyaslı infrastruktur layihələri, yaşayış məntəqələrinin salınması, sosial obyektlərin tikintisi və işğaldan azad edilmiş ərazilərin mərhələli şəkildə məskunlaşdırılması Böyük Qayıdış proqramının uğurla davam etdiyini göstərir. Bu proses postmünaqişə dövründə tətbiq edilən ən sistemli və sürətli yenidənqurma modellərindən biri kimi beynəlxalq təcrübə üçün də mühüm nümunədir.
Belə ki, Prezident İlham Əliyevin rəhbərliyi ilə Azərbaycan müasir, güclü və qalib dövlət kimi inkişafını davam etdirir. Bu liderlik modeli strateji düşüncə, siyasi iradə, milli maraqlara sədaqət və gələcəyə yönəlmiş dövlətçilik fəlsəfəsinin təcəssümüdür. Azərbaycan bu yol ilə regional və qlobal miqyasda mövqelərini daha da möhkəmləndirir”.
