Abşeron Rayon Məhkəməsində qəsdən sağlamlığa az ağır zərər vurmada təqsirləndirilən Rafiq İsayevin (adı, soyadı şərtidir) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Firuzə Kərimovanın sədrliyi ilə keçirilən prosesdə hökm oxunub.
Məhkəmənin hökmü ilə o, 1 il 6 ay müddətinə azadlığın məhdudlaşdırılması (elektron qolbaq) cəzasına məhkum edilib.
İttiham aktına əsasən, 2008-ci il təvəllüdlü Rafiq İsayev Abşeron rayonu, Xırdalan şəhəri, Qələbə küçəsi ilə piyada hərəkətdə olarkən həmin küçədə yerləşən “Misir” parkının yaxınlığında tanımadığı zərərçəkmiş Tahir Əbilovla (soyadı şərtidir) aralarında şəxsi münasibətlər zəminində mübahisə yaranıb.
Belə ki, zərərçəkmiş şəxsin mobil telefonu qulağına tutaraq telefonla danışırmış kimi davranması və onun yanından keçərkən “ay qaqa” deyə səslənməsi səbəbindən tərəflər arasında sözlü mübahisə baş verib. Daha sonra hər iki şəxs parkın arxa hissəsinə keçib və təqsirləndirilən şəxs xuliqanlıq niyyəti ilə, əsaslı səbəb olmadan qəsdən yumruqla Tahirin bir dəfə ağız, bir dəfə isə sol qarın nahiyəsindən vuraraq xəsarət yetirib.
Bu xəsarətlər dərəcəsinə görə zərərçəkmiş şəxsin sağlamlığının uzun müddətə pozulmasına səbəb olan qəsdən sağlamlığa az ağır zərər kimi qiymətləndirilib.
Məhkəmə iclasında Rafiq İsayev qanuni nümayəndəsinin iştirakı ilə ifadə verərək özünü qismən təqsirli bilib. O, hadisənin zərərçəkmiş şəxsin onu çağırdığını zənn etməsi səbəbindən baş verdiyini, mübahisənin 3-4 dəqiqə davam etdiyini və əsəblərini cilovlaya bilməyərək Tahirə yumruq zərbələri endirdiyini etiraf edib. Təqsirləndirilən şəxs hadisəni xuliqanlıq niyyəti ilə törətmədiyini, zərərçəkmiş şəxslə barışdığını və ondan üzr istədiyini bildirib.
Tahir Əbilov və onun qanuni nümayəndəsi tərəfindən məhkəməyə təqdim edilmiş ərizədə tərəflər arasında barışığın əldə olunduğu, dəymiş ziyanın ödənildiyi, zərərçəkmiş şəxsin təqsirləndirilən şəxsə qarşı heç bir şikayət və tələbinin olmadığı qeyd olunub. Zərərçəkmiş şəxs səhhətində yaranmış problem səbəbindən məhkəmə iclasında iştirak edə bilmədiyini bildirərək ibtidai istintaqda verdiyi ifadəsini təsdiqləyib.
Kamal Məmmədov
