Gürcüstanın keçmiş müdafiə naziri Baço Axalaya 4 oktyabrda Tbilisidə baş verən zorakı etiraz aksiyasını təşkil etmək ittihamı ilə saxlanılıb. Bu barədə Gürcüstan Dövlət Təhlükəsizlik Xidmətinin rəsmi açıqlamasında bildirilib.
Axalayanın həyat yoldaşı Anna Nadareişvili də eyni işlə əlaqədar saxlanılıb, lakin o vaxtdan bəri azadlığa buraxılıb.
Gürcüstan Dövlət Təhlükəsizlik Xidməti bildirib ki, məhkəmə qərarı ilə ələ keçirilən məlumatlar emal edilərkən, 4 oktyabr hadisələri zamanı Axalayanın internet tətbiqlərindən istifadə edərək tədbirləri uzaqdan idarə etdiyi və etirazların əsas təşkilatçısı olduğu müəyyən edilib.
İstintaqa görə, o, əvvəllər iş üzrə saxlanılan Burçuladze, Zodelava, Nadiradze, Manjqaladze və Beridze ilə dəfələrlə mobil tətbiqlər vasitəsilə əlaqə saxlayıb. İştirakçılar etiraz planını müzakirə edib və hərəkətlərini əlaqələndiriblər.
Müvafiq bəyanat Gürcüstan Dövlət Təhlükəsizlik Xidmətində keçirilən brifinqdə verilib.
Əziz Mustafa
