Ekspertlər hesab edir ki, Rusiya müharibə bitdikdən və hətta Putin getdikdən sonra da xarici investorlar üçün riskli mühit olaraq qalacaq...
Poliqon xəbər verir ki, təcrübəli amerikalı investorlar və analitiklər Rusiya bazarını “Zümrüd şəhəri” və ya “Eldorado” kimi görmürlər və orada biznes aparmağın yüksək risk daşıdığını bildirirlər. Wall Street Journal-ın məlumatına görə, prezident Trampın nümayəndələri, milyarderlər Stiv Uitkoff və Cared Kuşner üçün Rusiya böyük təbii resurslar və biznes imkanları ölkəsi olsa da, risklər çox yüksəkdir.
Geosiyasi risk analitiki Çarlz Hekker, Sovet İttifaqı və Rusiyada 40 illik iş təcrübəsinə əsaslanaraq bildirib: “Rusiya Zümrüd şəhəri də deyil, Eldorado da… Mükafatın ölçüsü bəzilərinin düşündüyü qədər dəböyük deyil”.
Analitiklərin fikrincə, 2,5 trilyon dollarlıq Rusiya iqtisadiyyatı İtaliya səviyyəsində zəif, uzunmüddətli böyümə perspektivləri, əhalinin azalması, əlçatan neft ehtiyatlarının tükənməsi və enerji sektorundan kənar artım amillərinin olmaması ilə üzləşir.
Hekker və digər təcrübəli ABŞ investorları bildirirlər ki, Rusiyada biznes aparmaq riski təkcə iqtisadi deyil, həm də hüquqi və siyasi təhlükələrlə müşayiət olunur. Aktivlərin itirilməsi və hətta həbs olunma ehtimalı investorlar üçün real təhlükə olaraq qalır. Onun sözlərinə görə, Ukrayna münaqişəsinin həlli belə Qərb şirkətlərinə qarşı düşmən münasibətləri dayandırmayacaq və xarici şirkətləri davamlı geosiyasi qeyri-müəyyənliklə üz-üzə qoyacaq.
“Hər hansı bir şəkildə Rusiya Qərbə qarşı ümumi düşmənçiliyi Putin Kremldə olduğu müddətcə və ola bilsin, ondan sonra da davam edəcək… İndi Qərb şirkətlərinə qırmızı xalça səriləcəyini düşünmək ağılsızlıq olardı”, deyə Hekker qeyd edib.
Poliqon.info
