Rusiya Prezidenti Vladimir Putin dekabrın 26-da Təhlükəsizlik Şurasının daimi üzvləri ilə operativ müşavirə keçirib. Müşavirədə ölkənin müdafiə və təhlükəsizlik maraqları naminə süni intellektin (Sİ) inkişafı üzrə əlavə tədbirlər də müzakirə olunub. Bu barədə Kremlin mətbuat xidməti məlumat yayıb.
Putin dekabrın 25-də Rusiya Dövlət Şurasının iclasında bildirib ki, qarşıdakı 10–15 il süni intellektin inkişafı və qlobal texnoloji transformasiya baxımından misilsiz bir dövr olacaq. Onun fikrincə, dünya indiyədək analoqu olmayan ən böyük texnoloji sıçrayışla üz-üzədir.
Rusiya lideri qeyd edib ki, süni intellekt miqyasına və təsir gücünə görə hətta kosmosun mənimsənilməsi ilə müqayisədə daha fundamental və hərtərəfli texnologiyadır. Prezidentin sözlərinə görə, Sİ həyatın bütün sahələrinə sürətlə nüfuz edir.
Xatırladaq ki, Putin dekabrın 17-də Rusiya Silahlı Qüvvələrində robot texnikasının və süni intellekt texnologiyalarının sürətlə tətbiq olunması ilə bağlı tapşırıqlar verib. O, həmçinin avtonom döyüş komplekslərinin idarəetmə sistemlərində süni intellektdən istifadənin genişləndirilməsinin vacibliyini vurğulayıb.
Putinin çıxışları göstərir ki, Rusiya süni intellekti artıq təkcə mülki və iqtisadi inkişaf aləti kimi deyil, həm də milli təhlükəsizliyin əsas dayaqlarından biri kimi dəyərləndirir. Sİ-nin müdafiə sahəsinə inteqrasiyası gələcəkdə hərbi doktrinaların dəyişməsinə, texnoloji rəqabətin isə daha da kəskinləşməsinə yol aça bilər. Bu yanaşma qlobal miqyasda süni intellekt üzərində geosiyasi mübarizənin yeni mərhələyə keçdiyini də nümayiş etdirir.
