BAKI, 28 dekabr. TELEQRAF
Astronomlar Süd Yolunun ən aktiv ulduz formalaşma bölgələrindən biri hesab edilən NGC 2264 dumanlığında qeyri-adi ulduz strukturu aşkarlayıblar. “Cosmic Christmas Tree” (“Kosmik Yeni il ağacı”) adlandırılan bu formasiya Monokros bürcündə, Yerdən təxminən 2 700 işıq ili uzaqlıqda yerləşir.
Teleqraf xəbər verir ki, bu barədə "Interesting Engineering" məlumat yayıb.
Mütəxəssislər bildirirlər ki, bölgədə böyük miqdarda qaz və kosmik toz saxlanıldığı üçün burada yeni ulduzlar intensiv şəkildə yaranır. Gənc ulduzların üçbucaqvari düzülüşü teleskopik görüntülərdə Yeni il ağacına bənzər mənzərə formalaşdırır.
Regionda yerləşən massiv S Monocerotis ulduzu ətraf mühiti işıqlandıraraq mavi parıltı yaradır. Hidrogen qazının ultrabənövşəyi şüalarla həyəcanlanması isə dumanlığa qırmızı rəngli parıltı verir. Məhz qırmızı və mavi işığın birləşməsi “Kosmik Yeni il ağacı”na xüsusi vizual effekt qazandırır.
Alimlərin sözlərinə görə, NGC 2264 dumanlığı ulduz formalaşmasının müxtəlif mərhələlərinin eyni anda müşahidə olunduğu unikal kosmik laboratoriya hesab olunur.
