İngiltərənin Exeter Universiteti Tibb Məktəbinin alimləri neonatal şəkər xəstəliyinə səbəb olan yeni gen -TMEM167A müəyyən ediblər.
AzEdu.az-ın xarici KİV-dən əldə etdiyi məlumata görə, adətən doğumdan sonrakı ilk 6 ay ərzində ortaya çıxan bu nadir xəstəlik körpələrdə insulin istehsalının yetərsizliyi ilə xarakterizə olunur.
Araşdırmaya görə, TMEM167A genindəki dəyişikliklər pankreasda insulin istehsal edən beta hüceyrələrinin fəaliyyətini pozur, hüceyrə stressini artırır və insulin çatışmazlığına səbəb olur.
Tədqiqat zamanı altı körpədə həm neonatal şəkər xəstəliyi, həm də epilepsiya və mikrosefaliya kimi nevroloji problemlər aşkarlanıb. Alimlər bildirir ki, sözügedən gen bəzi neyronların fəaliyyətində də mühüm rol oynayır.
Mütəxəssislər bu kəşfin neonatal şəkər xəstəliyinin erkən diaqnostikası və müalicə imkanlarının inkişafına töhfə verəcəyini vurğulayırlar.
Zeynəb Tehranlı
