Yeni ildə fişəng atılması doğrudur?

Yeni il gecəsi bir çox ölkədə milyonlarla insan atəşfəşanlıqda iştirak edir. 

Qeyd edək ki, fişənglərdən son illər əsasən toy mərasimlərində və Yeni il axşamı istifadə edilir. 

"Cebheinfo.az" xəbər verir ki, atəşfəşanlığın ən çox olduğu ölkələrdən biri də Almaniyadır. Adətən ilin digər vaxtlarında qadağan edilən atəşfəşanlıqdan fərdi istifadə Yeni il gecəsi və yeni ilin ilk günündə olduqca populyardır. 

Almanlar bu Yeni il gecəsi 40 min tondan çox fişəng atmağa hazırlaşırlar. Yeni il gecəsi mağazalar açılan kimi vətəndaşlar fişəng almaq üçün mağazalara axın ediblər. Aşağı Saksoniyanın Meppen şəhərində Hollandiya sərhədinə yaxın bir mağazanın qarşısında uzun növbələr yaranıb. 

Alış-veriş arabaları ilə gözləyən vətəndaşlar soyuq havaya baxmayaraq, mağaza qapılarının açılmasını gözləyiblər. Bremerhaven liman şəhərində bir çox insan gecə boyu səhər satışa çıxarılan fişəng mağazasının qarşısında gözləyiblər. Hamburqda da sıxlıq müşahidə edilib. 100-dən çox insan fişəng almaq üçün növbəyə düzülüb. 

Almaniya qanunlarına görə, Yeni il gecəsi yalnız üç iş günü ərzində, gecə yarısından başlayaraq fişəng satışına icazə verilir. Onlayn mağazalar da əvvəlcədən sifariş edilmiş fişəngi müştərilərə çatdıra bilər. Lakin atəşfəşanlığa yalnız Yeni il gecəsi və Yeni il günü icazə verilir. 

On minlərlə fişəngin atılması bəzi Almaniya şəhərlərində Yeni il şənliklərini müharibə zonasına bənzər bir vəziyyətə çevirir. Fişəng istifadə edildikdə tez-tez ciddi xəsarətlər, bəzən isə ölüm halları baş verir. Evdə hazırlanmış partlayıcı maddələr və "top bombaları" kimi tanınan güclü qanunsuz fişənglər xüsusilə təhlükəlidir. 

Keçən il Almaniyada Yeni il gecəsi ehtiyatsızlıqdan istifadə edilən atəşfəşanlıq səbəbindən beş nəfər həyatını itirib. Son 10 ildə hər Yeni il gecəsi atəşfəşanlıqla bağlı xəsarətlər səbəbindən orta hesabla 530 nəfər xəstəxanaya yerləşdirilib. 

Hər il tibb mütəxəssisləri, polis məmurları, ətraf mühit və heyvan hüquqları fəalları satışların qadağan edilməsini tələb edirlər. Bütün bu ictimai narahatlıqlara baxmayaraq, Alman Pirotexnika Sənayesi Assosiasiyası (VPI) bu il ötən illə müqayisədə 10-15 faiz daha çox məhsul satışı gözləyir. 

Assosiasiyanın məlumatına görə, sektor 2024-cü ildə 197 milyon avro satış qeydə alıb. Bu rəqəm 2023-cü ildə 180 milyon avro olub.