Azərbaycana qarşı hərbi cinayətlər törətməkdə ittiham olunan və hazırda Bakıda məhkəməsi davam edən keçmiş qondarma rejimin "dövlət naziri" Ruben Vardanyanın səs yazısı yayılıb.

Globalinfo.az xəbər verir ki, səs yazısını Ermənistanın Yaşamaq üçün Torpaq Partiyasının həmtəsisçisi Mane Tandilyan paylaşıb. 

Vardanyan 3 dəqiqə yarımlıq səs yazısında onu dəstəkləyən ermənilərə təşəkkürünü bildirib və bayramlarını təbrik edib:

"Mənə göndərdiyiniz məktublar, haqqımdakı fikirləriniz və emosiyalarınız üçün təşəkkürümü bildirirəm. Bunu hiss edirəm, enerji alıram. Hər kəsə xoş bayram əhvali-ruhiyyəsi arzulayıram. Haradasa oxumuşam ki, ən yaxşı səyahət öz daxilinə olan səyahətdir. Nə qədər çox sevinirsizsə, bu hissləri başqalarına da çatdıra bilirsiniz, bir o qədər də güclü olursuz. Bayram ab-havasını evinizdə hiss edin, uşaqlarınızla cizgi film izləyin, nağıllar dinləyin.

Biz Allaha və özümüzə olan inamı itirmişik. Bu dünyada heç bir istinad nöqtəniz olmadığı zaman özünüz kimi qalmaq çox çətindir. Kaş ki, hamınızın istinad nöqtəsi olaydı".

Diqqətçəkən məqam Vardanyanın vəziyyətinin yaxşı olmasını vurğulamasıdır:

"Məndə hər şey yaxşıdır, qaydasındadır. Bir daha hər kəsin bayramını təbrik edirəm".