Ətir gündəlik baxımın və şəxsi üslubun ayrılmaz hissəsidir. Lakin ətirin düzgün tətbiq olunmaması qoxunun həm tez itməsinə, həm də narahatedici təsir göstərməsinə səbəb ola bilər.
Pravda.az bildirir ki, ətirin qalıcı və xoş təsir bağışlaması üçün onu doğru şəkildə istifadə etmək vacibdir.
Ətir növləri – eau de toilette, eau de parfum və parfüm – tərkibindəki essensiya miqdarına görə fərqlənir. Daha yüngül tərkibli ətirlər gündəlik istifadə üçün uyğun hesab olunur, daha tünd və qalıcı ətirlər isə az miqdarda tətbiq edilməlidir.
Ətir əsasən bilək içi, boyun, qulaq arxası və boyun arxası kimi nəbz nöqtələrinə vurulmalıdır. Sıxdıqdan sonra ətiri ovmaq tövsiyə edilmir, çünki bu, qoxunun strukturunu poza bilər. Günəşə çıxmazdan əvvəl və ya birbaşa saç üzərinə ətir sıxmaq da məsləhət görülmür.
Mövsümə uyğun ətir seçimi də önəmlidir. İsti havalarda daha yüngül və təravətli qoxulara, soyuq aylarda isə daha isti və qalıcı notlara üstünlük verilməsi tövsiyə olunur.
Əminə Bayramova
