Ermənistan parlamentinin deputatları Oman, Kolumbiya və Dominikan Respublikası ilə parlamentlərarası dostluq qruplarının yaradılmasını planlaşdırır. Bu təşəbbüslər adıçəkilən ölkələrin parlamentariləri ilə aparılan təmaslar zamanı irəli sürülüb.
Bu barədə Ermənistan parlamentinin Xarici əlaqələr üzrə daimi komissiyasının sədri, hakim “Vətəndaş müqaviləsi” partiyasından deputat Sarqis Xandanyan qanunvericilik təşəbbüslərinin müzakirəsi zamanı məlumat verib.
Onun sözlərinə görə, Ermənistan Omanla kifayət qədər fəal dialoq aparır və ötən il bu ölkədə daimi səfirlik açılıb. Sarqis Xandanyan Kolumbiya tərəfinin də parlamentlərarası əlaqələrin gücləndirilməsində maraqlı olduğunu bildirib.
Dominikan Respublikası ilə keçirilən görüşlər zamanı da dostluq qrupunun yaradılması ideyasının müzakirə edildiyi və dominikanlı parlamentarilər tərəfindən müsbət qarşılandığı qeyd olunub.
Məsələ parlament komissiyasında operativ şəkildə müzakirə edilib və nəticədə təşəbbüslər komissiya tərəfindən müsbət rəy alıb.
