ain.az bildirir, Ayna portalına istinadən.
Sosial media şirkətləri bir ildə uşaqlara və yeniyetmələrə məxsus 4,7 milyon hesaba girişi bloklayıb
Ölkənin internet tənzimləyicisi olan “eSafety” tərəfindən dərc edilən məlumatlara görə, Avstraliyada 16 yaşdan kiçiklər üçün sosial medianı qadağan edən qanun qüvvəyə mindikdən bəri uşaqlara və yeniyetmələrə məxsus ən azı 4,7 milyon hesab deaktiv edilib və ya silinib.
AYNA.AZ xəbər verir ki, agentliyin məlumatına görə, 10 dekabr 2025-ci ildən bəri Avstraliyada fəaliyyət göstərən sosial media şirkətləri uşaqlara və yeniyetmələrə məxsus 4,7 milyon hesaba girişi bloklayıb. Komissar Julie Inman-Qrant bildirib ki, "aparıcı platformalar 16 yaşdan kiçiklərin hesablara girişinin qarşısını almaq üçün əhəmiyyətli tədbirlər görür və mən ilkin nəticələrdən çox məmnunam".
O həmçinin qeyd edib ki, “eSafety” "istifadəçi yaşının aşkarlanmasının dəqiqliyini və effektivliyini artırmaq və qanuni tələblərin pozulmasının qarşısını almaq" üçün texnologiya şirkətləri ilə işləməyə davam edəcək.
"Əlbəttə ki, bəzi uşaqlar qadağaları aşmaq və sosial mediada qalmaq üçün yaradıcı yollar tapırlar, lakin unutmamaq vacibdir ki, bu halda uğur ümumi zərərin azaldılması və mədəni normaların bərpası ilə ölçülür", - deyə komissar vurğulayıb və əlavə edib ki, tənzimləyici "istifadəçilərin digər platformalara miqrasiyasını izləmək də daxil olmaqla məlumat toplamağa davam edəcək".
Avstraliyanın Baş naziri Entoni Albanese bildirib ki, "sosial media şirkətləri qanunlara riayət etmək üçün əhəmiyyətli səylər göstərir və bu, ümidvericidir".
"Dəyişiklik bir gecədə baş vermir, lakin ilkin dəlillər bunun baş verməsini təmin etmək üçün bütün addımları atdığımızı göstərir", - deyə o bildirib.
Lakin Avstraliya insan haqları təşkilatlarının nümayəndələri daha az nikbindirlər. Rəqəmsal Hüquqları İzləmə Təşkilatının sədri Lizzi O'Şi bildirib ki, "silinən hesabların sayı uğurun göstəricisi hesab edilə bilməz".
"Burada vacib olan sosial media qadağasının gənclərin rifahına təsiridir. Bu baxımdan, o təsirsiz olaraq qalır. Yeniyetmələr dəstək şəbəkələrindən kəsilməklə barışıblar və bir çoxları üçün qadağa ciddi zərər verib", - deyə o bildirib.
Avstraliyada 16 yaşdan kiçik şəxslərin sosial mediaya çıxışını qadağan edən qanun 10 dekabr 2025-ci ildə qüvvəyə minib. Qadağa “Facebook”, “Instagram”, “Kick”, “Reddit”, “Snapchat”, “Threads”, “TikTok”, “Twitch”, “X” və “YouTube”a aiddir. Yeni qanunvericilik, yetkinlik yaşına çatmayanların hesablarını deaktiv etmək üçün bütün mümkün tədbirləri görmədikləri təqdirdə 49,5 milyon Avstraliya dollarına (32,9 milyon dollar) qədər cərimə ilə üzləşəcək texnoloji platformalara tam məsuliyyət qoyur.
Hadisənin gedişatını izləmək üçün ain.az saytında ən son yeniliklərə baxın.
