Gündəlik həyatda tez-tez tətbiq olunan bəzi gigiyena vərdişləri ilə bağlı yanlış təsəvvürlər mövcuddur. Bu yanlışlar sağlamlığa gözlənilməz zərərlər verə bilər.
Pravda.az bildirir ki, antibakterial sabunların adi sabunlardan daha təsirli olduğu düşünülür. Lakin mütəxəssislər bu məhsulların hormonal balansı poza biləcəyini və adi sabunlarla eyni dərəcədə təsir göstərdiyini qeyd edirlər.
Evdə ən çox bakteriya toplanan yerlərin tualet olduğu zənn edilsə də, araşdırmalar mətbəx və hamam lavabolarının daha çirkli ola biləcəyini göstərir. Unitaz qapağı açıq halda sifon çəkildikdə isə mikroblar havaya yayılaraq ətrafdakı əşyalara, o cümlədən diş fırçasına keçə bilər.
Əllərin qurulanmasında kağız dəsmallar hava ilə qurudan aparatlara nisbətən daha gigiyenik hesab olunur. Diş protezləri və damaqlar kifayət qədər təmizlənmədikdə kif və sağlamlıq üçün təhlükəli bakteriyalar üçün əlverişli mühit yaradır.
“5 saniyə qaydası” kimi tanınan fikir də artıq etibarlı sayılmır. Yerə düşən qidalar çox qısa zamanda bakteriyalarla çirklənir. Bundan başqa, göbək dəliyi kifayət qədər təmizlənmədikdə mikrobların toplanma nöqtəsinə çevrilə bilər.
Dəri problemləri, xüsusilə sızanaq zamanı sərt və alkoqollu məhsulların istifadəsi tövsiyə edilmir. Yüngül və dərinin tipinə uyğun vasitələr daha effektivdir. Mütəxəssislər həmçinin saçların hər gün şampunlanmasının təbii yağ balansını poza biləcəyini, həftədə 2–3 dəfə yuyulmasının kifayət etdiyini bildirirlər.
Kontakt linza istifadəçilərinə isə linzaları heç vaxt kran suyu ilə yuyulmaması və linza qablarının mütəmadi dəyişdirilməsi tövsiyə olunur.
Əminə Bayramova
