Mərkəzi Bankın yeni hədəfi

Rusiya Mərkəzi Bankı fiziki şəxslərin xaricə etdiyi pul köçürmələri üzərində nəzarəti sərtləşdirməyi planlaşdırır.

"Cebheinfo.az" xəbər verir ki, "İnterfaks"-ın əldə etdiyi qaydalar layihəsinə görə, banklar müştərilərinin transsərhəd əməliyyatları haqqında daha ətraflı məlumat təqdim etmək məcburiyyətində qalacaqlar. 

Bu çərçivədə kompüter oyunları, onlayn xidmətlər, rabitə servisləri, cərimələr, təzminatlar və maddi yardımlar kimi bəndlər ayrı-ayrılıqda hesabat veriləcək.

Tənzimləmə yalnız gündəlik xərclərlə məhdudlaşmayacaq. Mərkəzi Bank xarici onlayn ticarət platformalarından edilən alış-verişlər, xaricdən avtomobil alınması, həmçinin kripto aktiv və rəqəmsal valyuta əməliyyatları barədə də təfərrüatlı məlumat tələb edəcək. 

Bundan əlavə, göndərən və alan tərəfin rezidentlik statusu, əməliyyat komissiyası, köçürmənin mənbəyi və üsulu kimi elementlər də qeydiyyata alınacaq. Nağd pul, bank hesabı, kart və ya elektron pul kimi bütün mənbələr izləniləcək.

Mərkəzi Bankın fikrincə, bu addımın məqsədi mövcud iqtisadi şəraitdə transsərhəd pul hərəkətlərinə dair daha ətraflı statistik infrastruktur yaratmaqdır. Tənzimləyici qurum vurğulayır ki, tədiyyə balansı, beynəlxalq investisiya mövqeyi və xarici borc məlumatlarının daha dəqiq əks olunması üçün bu məlumatlara ehtiyac var.

Rəqəmsal bankçılıq sistemləri tərtibatçısı "Self" şirkətinin rəhbəri Kirill İvanov qeyd edir ki, dəyişikliklər xüsusilə kripto əməliyyatlarını daha şəffaf etməyi hədəfləyir. İvanovun fikrincə, Mərkəzi Bank uzun müddətdir ki, pul axınlarını daha yaxından izləmək istəyir və bu tənzimləmə də həmin istiqamətdə atılmış yeni bir addımdır. 

Böyük məbləğdə kripto əməliyyatları edən istifadəçilər daha çox diqqət mərkəzində olacaq, sıravi xarici alış-veriş edən şəxslərin isə ciddi şəkildə təsirlənməyəcəyi düşünülür.

Maliyyə İnnovasiyaları Assosiasiyasının sədri Roman Proxorov isə xatırladır ki, Rusiyada kripto mayninqi artıq qanuni hala gəlib və kripto valyutaların istifadə sahəsinin genişləndirilməsi planlaşdırılır. Toplanacaq məlumatlar həm bazarın real həcmini anlamağa, həm də sanksiyalar altında transsərhəd ödənişləri daha səmərəli etməyə kömək edəcək.

Transsərhəd pul hərəkətləri son illərdə ciddi dalğalanmalar yaşayıb. 2022-ci ildə Rusiya vətəndaşlarının xaricdəki hesablara köçürdüyü məbləğ təxminən 12,8 milyar dollara çatıb. Bu rəqəm 2023-cü ildə 10,9 milyar dollara, 2024-cü ildə isə 7,8 milyar dollara geriləyib. 

2025-ci ildə isə mənzərə dəyişib və avqust ayı etibarilə Rusiyaya gələn pulun miqdarı xaricə gedəndən təxminən 730 milyon dollar çox olub. İlin sonunda Mərkəzi Bank bazardakı sabitliyi əsas gətirərək, daha əvvəl tətbiq edilən valyuta köçürmə limitlərini də ləğv edib.