Kiyev və Vaşinqton arasında aparılan müzakirələrdə təhlükəsizlik zəmanətləri və müharibənin dayandırılması üçün sənədlər müzakirə olunub...
Poliqon xəbər verir ki, Ukrayna prezidenti Volodimir Zelenski Telegram kanalında yayımladığı videomüraciətdə ölkə nümayəndə heyətinin ABŞ-nin Florida ştatında Vaşinqton rəsmiləri ilə keçirilən danışıqlar barədə məruzə etdiyini bildirib. Dövlət başçısının sözlərinə görə, tərəflər münaqişənin tənzimlənməsi istiqamətində bir neçə raund müzakirə aparıb və hərbi əməliyyatların dayandırılması üçün zəruri olan sənədlər üzərində işləyir.
Zelenski qeyd edib ki, Kiyev ABŞ-ni Rusiyanın Ukraynanın enerji infrastrukturuna davamlı zərbələri barədə mütəmadi şəkildə məlumatlandırır. Onun fikrincə, bu hücumlar ölkənin enerji təhlükəsizliyi və mülki əhalinin həyat şəraiti üçün ciddi risklər yaradır və beynəlxalq səviyyədə diqqət tələb edir.
Danışıqlarda iştirak edən Milli Təhlükəsizlik və Müdafiə Şurasının katibi Rüstəm Umerov da Telegram-da yekunlarla bağlı paylaşım edib. O bildirib ki, müzakirələr iki gün davam edib və kifayət qədər ətraflı xarakter daşıyıb. Umerovun sözlərinə görə, tərəflər Ukraynanın iqtisadi inkişaf perspektivlərini, rifah planını, eləcə də təhlükəsizlik zəmanətlərini ətraflı müzakirə ediblər. Xüsusilə bu zəmanətlərin praktiki mexanizmlərlə necə həyata keçiriləcəyi və icra olunacağı məsələlər diqqət mərkəzində olub.
Umerov əlavə edib ki, tərəflərin nümayəndə heyətləri məsləhətləşmələrin Davosda davam etdirilməsi barədə razılığa gəliblər. Bu, Ukrayna böhranının siyasi-diplomatik yollarla həllinə yönəlmiş səylərin davam etdiriləcəyini göstərir.
Məlumata görə, danışıqlara qatılmaq üçün Ukrayna prezidentinin ofisinin rəhbəri Kirilo Budanov, Rüstəm Umerov və parlamentdə “Xalqın xidmətçisi” partiyasının fraksiyasının rəhbəri David Araxamiya bir gün əvvəl ABŞ-yə səfər ediblər. Florida ştatında keçirilən görüşlərdə onlar ABŞ prezidentinin xüsusi nümayəndəsi Stiv Uitkoff, Donald Trampın kürəkəni, iş adamı Cared Kuşner və ABŞ Quru Qoşunlarının naziri Daniel Driskoll ilə bir araya gəliblər.
Poliqon.info
