Türkiyə prezidenti bunun həm Suriya, həm də regionun təhlükəsizliyi üçün vacib olduğunu bildirib...
Poliqon xəbər verir ki, Türkiyə prezidenti Rəcəb Tayyib Ərdoğan Suriya prezidenti Əhməd əş-Şəraa ilə telefon danışığında Ankaranın Dəməşqi terrorla mübarizədə dəstəkləməkdə davam etməyə hazır olduğunu təsdiqləyib. Liderlər söhbət zamanı Suriyada baş verən son hadisələri və regiondakı təhlükəsizlik vəziyyətini müzakirə ediblər.
Ərdoğan telefon danışığında vurğulayıb ki, terrorizmin Suriya ərazisindən tamamilə aradan qaldırılması yalnız bu ölkə üçün deyil, bütövlükdə region üçün həyati əhəmiyyət daşıyır. Onun sözlərinə görə, Suriyada sabitliyin bərqərar olması Yaxın Şərqdə uzunmüddətli təhlükəsizlik və siyasi sabitliyin təmin edilməsi baxımından əsas şərtlərdən biridir. Türkiyə prezidenti bu mövqeyin Ankaranın regional siyasətində prioritet olaraq qaldığını bildirib.
Xatırladaq ki, yanvarın 18-də Suriya prezidenti Əhməd əş-Şəraa kürdlərin rəhbərlik etdiyi “Suriya Demokratik Qüvvələri”nin lideri Mazlum Abdi ilə razılaşma əldə olunduğunu elan edib. 14 maddədən ibarət bu razılaşma atəşkəsin təmin edilməsini, kürd silahlı birləşmələrinin bütün döyüşçülərinin Suriya ordusunun tərkibinə daxil edilməsini, həmçinin kürdlərin nəzarətində olan neft yataqlarının hökumətə təhvil verilməsini nəzərdə tutur. Analitiklər hesab edirlər ki, bu razılaşma Suriyada mərkəzi hakimiyyətin mövqelərinin möhkəmlənməsinə və silahlı qarşıdurmaların azalmasına gətirib çıxara bilər.
Poliqon.info
