SDQ rəhbərliyi razılaşmaya baxmayaraq silahlı strukturun saxlanılacağını bildirir...
Suriyada kürdlərin rəhbərlik etdiyi “Suriya Demokratik Qüvvələri” (SDQ) koalisiyası buraxılmayacaq.
Poliqon xəbər verir ki, bu barədə təşkilatın komandanı Mazlum Abdi “Al Arabiya” telekanalına açıqlamasında bildirib.
Onun sözlərinə görə, əldə olunan razılaşmanın şərtləri qan tökülməsinin qarşısını almaq məqsədi ilə qəbul edilib. “Biz bu şərtləri qırğını dayandırmaq üçün qəbul etdik”, – deyə Mazlum Abdi qeyd edib.
Komandan vurğulayıb ki, SDQ nə dağılıb, nə də məğlub olub və qüvvələr öz nəzarətində olan əraziləri qorumaqda davam edəcək. TASS Agentliyinin məlumatına görə, Abdi bildirib ki, yanvarın 19-da Dəməşqə yollanacaq və razılaşma üzərində işi yekunlaşdıracaq. Onun sözlərinə əsasən, sənədin detalları paytaxta səfərdən qayıtdıqdan sonra ictimaiyyətə açıqlanacaq.
Müşahidəçilər hesab edirlər ki, SDQ-nin bu mövqeyi Suriyada kürd qüvvələrinin gələcək statusu və mərkəzi hökumətlə münasibətlərin formatı baxımından mühüm əhəmiyyət daşıyır. Eyni zamanda, bəyanat regionda hərbi-siyasi balansın tam dəyişmədiyini və kürd silahlı strukturlarının öz mövqelərini qorumağa çalışdığını göstərir.
Poliqon.info
