ABŞ Prezidenti Donald Tramp, siyasi səbəblərlə özünə və şirkətlərinə bank xidmətləri göstərilməsini dayandırdığı iddiası ilə “JPMorgan Chase” və bankın icraçı direktoru Ceymi Daymonu məhkəməyə verib.
"Cebheinfo.az" xəbər verir ki, iddia olunan təzminat məbləği 5 milyard dollardır.
Mayamidəki məhkəməyə təqdim edilən iddia ərizəsində “JPMorgan Chase”-in etik qaydalarına istinad edilərək bildirilib ki, bank Tramp və bəzi şirkətlərinə məxsus çox sayda bank hesabını birtərəfli qaydada bağlayıb və bunu heç bir xəbərdarlıq və ya həll təklifi təqdim etmədən edib.
Sənəddə Tramp və şirkətlərinin “JPMorgan Chase” vasitəsilə uzun illər ərzində yüz milyonlarla dollarlıq əməliyyat həyata keçirdiyi ifadə edilib.
İddia ərizəsində “JPMorgan Chase”in bu birtərəfli qərarının "siyasi və sosial motivlərdən", habelə bankın "Trampdan və mühafizəkar siyasi baxışlarından uzaqlaşmalı olduğu" yanaşmasından qaynaqlandığı irəli sürülüb.
Tramp və şirkətlərinin bu proses səbəbindən həm maddi, həm də nüfuz baxımından zərər gördüyü qeyd edilən ərizədə, ən azı 5 milyard dollar təzminat tələb edildiyi vurğulanıb.
ABŞ Prezidenti yanvarın 17-də sosial media hesabından paylaşım edərək, 6 yanvar hadisələrindən sonra ona bank xidmətləri göstərməyi dayandırdığını iddia etdiyi “JPMorgan Chase”ə qarşı məhkəmə iddiası qaldıracağını elan etmişdi.
