QHT.az xəbər verir ki, turistlər şərabı adətən Fransa və İtaliya ilə əlaqələndirsələr də, 2026-cı ildə Avropanın Şərab Paytaxtı kimi gözlənilməz bir şəhər – Sloveniyanın ikinci ən böyük şəhəri Maribor seçilib. Bu qərar European Best Destinations portalının mütəxəssisləri tərəfindən Avropanın 120-dən çox şərab bölgəsinin təhlili əsasında verilib.
Qiymətləndirmə irs, nüfuz, müxtəliflik, infrastruktur, qiymət-keyfiyyət nisbəti və ümumi şərab turizmi ekosistemi daxil olmaqla 26 meyar üzrə aparılıb. Sloveniyanın ən böyük şərab bölgəsinin mərkəzində yerləşən Maribor qədim üzümçülük ənənələrini müasir şəhər mədəniyyəti ilə birləşdirir. Şəhərin əsas simvollarından biri 450 ildən çox yaşı olan və hələ də bar verən dünyanın ən qədim üzüm tənəyidir. Maribor eyni zamanda Avropanın ən böyük tarixi yeraltı şərab zirzəmilərindən biri olan Vinag ilə də tanınır. Burada Šipon, Laški Riesling, Sauvignon Blanc, Chardonnay və Traminer kimi yüksək keyfiyyətli ağ şərablar istehsal olunur.
Ekspertlərə görə, Mariborda şərab sadəcə məhsul deyil, şəhərin kimliyinin ayrılmaz hissəsidir. Məhz bu xüsusiyyətlər Mariborun 2026-cı ildə Avropanın Şərab Paytaxtı seçilməsinə əsas olub.
R.İmanov
