BAKI,TurkicWorld, Orxan Qədirzadə
Tiqray bölgəsində humanitar vəziyyət getdikcə ağırlaşır və əhali kütləvi aclıq təhlükəsi ilə üz-üzədir.
TurkicWorld xəbər verir ki, ABŞ-nin humanitar yardımlarını azaltmasından sonra, Efiopiyanın şimalındakı Tiqray bölgəsində humanitar vəziyyət pisləşib
Eritreya sərhədi yaxınlığında yerləşən Hitsats kəndində yaşayan 88 yaşlı Nireayo Vubet son aylarda demək olar ki, hər gün qohumlarını və qonşularını dəfn etdiyini bildirir. Onun sözlərinə görə, bölgədə əsas ölüm səbəbi silahlı qarşıdurmalar deyil, məhz aclıqdır. ABŞ Beynəlxalq İnkişaf Agentliyinin maliyyələşdirməsinin dayandırılması Tiqrayda humanitar təşkilatların fəaliyyətini ciddi şəkildə məhdudlaşdırıb.
Dünya Ərzaq Proqramının məlumatına əsasən, Tiqray əhalisinin təxminən 80 faizi təcili humanitar yardıma ehtiyac duyur. Lakin maliyyə çatışmazlığı səbəbindən yardım əsasən digər qlobal böhran bölgələrinə yönəldilir. “Sərhədsiz Həkimlər” təşkilatı ABŞ-nin 2025-ci ildə etdiyi ixtisarların qlobal səhiyyə və humanitar proqramları sarsıtdığını, bunun isə xüsusilə Afrikada ağır nəticələr doğurduğunu açıqlayıb.
Tiqrayda daxili köçkün düşərgələrinin koordinatorları humanitar yardımın minimum səviyyədə olduğunu, insanların kütləvi şəkildə həyatını itirdiyini bildirirlər. Yerli rəsmilərin sözlərinə görə, ölüm halları artıq statistik qeydə alınmır, çünki əsas diqqət sağ qalanların yaşaması uğrunda mübarizəyə yönəlib. ABŞ yardımının kəsilməsi fonunda Ümumdünya Ərzaq Proqramının Şire şəhərindəki ofisinin bağlanması vəziyyəti daha da ağırlaşdırıb.
Efiopiya hökuməti ölkədə aclıq böhranının olmadığını bəyan etsə də, beynəlxalq təşkilatlar və yerli müşahidəçilər Tiqrayda vəziyyətin fəlakət həddinə çatdığını bildirirlər. Humanitar böhranın dərinləşməsi fonunda bölgə əhalisi beynəlxalq ictimaiyyətdən təcili dəstək gözləyir.
