Ukrayna-Rusiya cəbhəsində silahlı münaqişə davam edərkən, eyni zamanda diplomatik fəaliyyət də davam edir.
Kremlin sözçüsü Dmitri Peskov Moskvada jurnalistlərə cari məsələlərlə bağlı açıqlamalar verib.
Rusiya, ABŞ və Ukrayna arasında ötən həftə Birləşmiş Ərəb Əmirliklərinin (BƏƏ) paytaxtı Əbu-Dabidə keçirilən üçtərəfli danışıqlara toxunan Peskov deyib: "Bu barədə şərh verə bilmərəm. İlk təmasın son dərəcə məhsuldar olacağını gözləmək səhv olardı. Çətin məsələlər gündəmdədir, amma bu təmasların konstruktiv başlanğıcı belə müsbət əlamətdir. Rusiya, ABŞ və Ukrayna arasında üçtərəfli danışıqlar gələn həftə davam edəcək " .
Peskov bildirib ki, danışıqlar Rusiya ilə ABŞ arasında ötən il Alyaskanın Ankoric şəhərində keçirilən zirvə görüşündə əldə edilən razılaşmaya uyğun aparılmalıdır və əlavə edib ki, "Ankoricdə hazırlanmış formulun bir hissəsi olan ərazi məsələsinin həlli bizim üçün çox vacibdir".
