Almaniyada 7000-dən çox qaçqın itkin DÜŞÜB
Ajans.az BİLD qəzetinə istinadən xəbər verir ki, qəbul mərkəzlərində 7624 nəfər qeydiyyata alınıb və bundan sonra izləri itib. Qəbul mərkəzlərində yaşayan və müavinət alan şəxslər qeydiyyatdan çıxarılmadan sadəcə yoxa çıxa bilməzlər. Əgər sakin iki-üç gün ərzində yoxa çıxarsa, o, itkin düşmüş hesab olunur. Yalnız bir neçə nəfər qəbul mərkəzinə qayıdır. Məlumata görə, hazırda dövlət orqanları itkin düşmüş şəxsləri axtarmır, əksinə, onları sistemlərdən çıxarır, müavinət almaq hüququndan məhrum edir və ödəniş kartlarını bloklayır. Hakimiyyət orqanları bir çox qaçqının Almaniyada, xüsusən də qohumlarının olduğu böyük şəhərlərdə gizləndiyindən şübhələnir. Digərləri isə digər Avropa ölkələrinə və ya Böyük Britaniyaya keçmiş ola bilər. Bəzilərinin isə gəldikləri ölkələrə qayıtması da mümkündür.
