Rusiya Energetika Nazirliyi hökumətə istehsalçılar üçün benzin ixracına qoyulan qadağanın qəbul edildikdən sonra ləğv ediləcəyi barədə qərar layihəsi təqdim edib. Bu barədə İnterfaks agentliyinə vəziyyətlə tanış olan mənbə məlumat verib.
Energetika Nazirliyi şərh verməkdən imtina edib.
Qadağan hazırda 28 fevrala qədər qüvvədədir. Agentliyin mənbəyi bildirib ki, bütün hüquqi prosedurların tamamlanması üçün lazım olan vaxtdan asılı olaraq, o, 1 fevralda deyil, bir az sonra qaldırıla bilər.
Dekabrın sonunda Rusiya hökuməti benzin ixracına qoyulan embarqonu fevralın sonuna qədər uzadıb. İstehsalçı olmayanlar üçün dizel yanacağının, eləcə də dəniz yanacağının və digər qaz yağlarının ixracına qoyulan qadağa 28 fevral 2026-cı ilə qədər uzadılıb.
Yanvar ayının ortalarında Baş nazirin müavini Aleksandr Novak Energetika Nazirliyi, Federal Vergi Xidməti, Federal Antiinhisar Xidməti, Rosstat və Sankt-Peterburq Birjasının nümayəndələrinin iştirakı ilə yanacaq bazarı ilə bağlı iclas keçirib. İclasdan sonra hökumətin verdiyi açıqlamada bildirilirdi ki, regional səviyyədə qiymət dinamikasını, yanacaq ehtiyatlarını və istehsal gücünü göstərən yanacaq bazarı vəziyyətini hərtərəfli xəritələşdirmək üçün monitorinq sistemi yaradılıb.
Əziz Mustafa
