Kəlbəcər Rayon Məhkəməsində qəsdən sağlamlığa yüngül zərər vurmada təqsirləndirilən Əmirxan Tağıyevin (adı, soyadı şərtidir) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Həsən Qəniyevin sədrliyi ilə keçirilən prosesdə hökm oxunub.
Məhkəmənin hökmü ilə “Konstitusiya və Suverenlik İli” münasibətilə amnistiya elan edilməsi haqqında” Milli Məclisin 19 dekabr 2025-ci il tarixli qərarının 1.16 və 5.1- ci bəndlərinə əsasən, təqsirləndirilən şəxs Cinayət Məcəlləsinin 128-ci maddəsi ilə təqsirləndirilməsinə dair cinayət işinə xitam verilib. Əmirxan Tağıyev barəsində seçilmiş polisin nəzarəti altına vermə qətimkan tədbiri ləğv olunub.
İstintaq materiallarına əsasən, Əmirxan Tağıyev zərərçəkmiş İmran Ömərovun (adı, soyadı şərtidir) sağlamlığına qəsdən yüngül xəsarət yetirməkdə ittiham olunur.
Məlumata görə, hadisə 13 iyun 2025-ci il tarixdə, saat 00:30 radələrində Ağdərə rayonunun Vəng kəndi ərazisində qeydə alınıb.
Belə ki, təqsirləndirilən şəxslə onun tanışının yaşadığı evin dəhlizində zərərçəkmiş İmran Ömərovla arasında şəxsi münasibətlər zəminində münaqişə yaranıb. Münaqişə zamanı Əmirxan zərərçəkmiş şəxsə xəsarət yetirib.
Məhkəmə-tibbi ekspertizasının rəyinə əsasən, zərərçəkmiş şəxsə burun nahiyəsinin yumşaq toxumalarının əzilməsi ilə müşahidə olunan hematoma yetirilib. Sözügedən xəsarət sağlamlığın qısa müddətə pozulmasına səbəb olan və sağlamlığa qəsdən yüngül zərərvurma kimi qiymətləndirilib.
Məhkəmədə Əmirxan Tağıyev ona elan edilmiş ittiham üzrə özünü təqsirli bilib. O, ifadəsində hadisə baş verən vaxtdan əvvəl Xankəndi şəhərində yerləşən “Euro Aqro” adlı şirkətdə anbardar vəzifəsində çalışdığını, İmranın isə Xankəndində şirkətdə sürücü işlədiyini söyləyib.
Kamal Məmmədov
