BAKI, 28 yanvar. TELEQRAF
Səudiyyə Ərəbistanı öz hava məkanının və ərazisinin İran əleyhinə hərbi əməliyyatlar üçün istifadəsinə icazə verməyəcək.
Teleqraf xəbər verir ki, bu barədə krallığın baş naziri və vəliəhd şahzadəsi Məhəmməd bin Salman Al Səud İran İslam Respublikasının prezidenti Məsud Pezeşkianla telefon danışığı zamanı bildirib.
Səudiyyə Ərəbistanı Mətbuat Agentliyinin yaydığı açıqlamada qeyd olunur ki, vəliəhd şahzadə krallığın hava məkanının və ərazisinin İran İslam Respublikasına qarşı hər hansı hərbi fəaliyyət üçün istifadəsinə yol verilməyəcəyini vurğulayıb.
Öz növbəsində, Pezeşkian Məhəmməd bin Salman Al Səudu İranın nüvə proqramı üzrə aparılan danışıqların gedişi, eləcə də ölkədəki mövcud vəziyyət barədə məlumatlandırıb.
Xatırladaq ki, ABŞ prezidenti Donald Tramp daha əvvəl Vaşinqtonun İranda baş verən etirazlar fonunda güc tətbiqi imkanlarını nəzərdən keçirdiyini bildirmişdi. Yanvarın 23-də Tramp ABŞ-nin İranla bağlı vəziyyəti yaxından izlədiyini və regiona, o cümlədən hərbi gəmilər daxil olmaqla, əhəmiyyətli qüvvələr göndərdiyini açıqlamışdı.
