Alzheimer’s Europe təşkilatının yeni hesabatına əsasən, 2050-ci ilə qədər Avropada demensiya xəstələrinin sayı təxminən üçdə iki nisbətində – 64 faiz artacaq.
Editor.az xəbər verir ki, mütəxəssislər 2025-ci ilə qədər Avropa İttifaqının 27 ölkəsində 9 milyondan çox insanın, Aİ-yə daxil olmayan Avropa ölkələri də nəzərə alındıqda isə 12 milyondan artıq şəxsin demensiya xəstəliyindən əziyyət çəkəcəyini proqnozlaşdırırlar. Alimlərin hesablamalarına görə, 2050-ci ilə qədər bu rəqəmlər müvafiq olaraq 14,3 milyon və təxminən 19,9 milyon nəfərə yüksələcək. Bu isə demensiya xəstələrinin sayının Aİ-27 ölkələrində 58 faiz, ümumilikdə Avropada isə 64 faiz artması deməkdir.
Hesabat yenilənmiş demoqrafik məlumatlara əsaslanır və 2019-cu il üzrə Avropa Demensiya İlliyində təqdim olunan əvvəlki təhlilin davamıdır. Ümumilikdə, 2025 və 2050-ci illər üçün Aİ-də demensiya xəstələrinin sayına dair proqnozlar əvvəlki qiymətləndirmələrlə müqayisədə oxşar səviyyədə qalır.
Bununla yanaşı, tədqiqatçılar yayılma modelində mühüm dəyişikliklərin qeydə alındığını bildiriblər. Belə ki, kişilər arasında demensiyanın yayılma göstəriciləri 70 yaşdan yuxarı bütün yaş qruplarında, xüsusilə 70–74 yaş intervalında daha yüksək olub. Qadınlarda isə göstəricilər daha mürəkkəb və qeyri-bircins xarakter daşıyıb.
Alzheimer’s Europe gözlənilən artımın təcili tədbirlərin görülməsinin vacibliyini bir daha önə çəkdiyini vurğulayır. Bu tədbirlər demensiya xəstələri üçün diaqnoz mərhələsindən ömrün sonunadək hərtərəfli tibbi və sosial qayğı göstərə bilən sistemlərin formalaşdırılmasını nəzərdə tutur.
Alimlər xatırladırlar ki, demensiya yaddaşın, düşünmə qabiliyyətinin, fikirləri aydın ifadə etmə və məkan oriyentasiyasının tədricən zəifləməsi ilə xarakterizə olunan sindromdur. Qeyd olunur ki, demensiya yaşlanmanın təbii hissəsi deyil; onun əsas səbəbinin travma, xəstəlik və ya toksik zülalların yığılması nəticəsində yaranan üzvi beyin zədələnməsi olduğu hesab edilir.
//Gülnarə Abasova, Editor.az
