Qızıl qiymətləri əmtəə bazarlarında rekord səviyyəyə yüksəlməkdə davam edir. Bu gün əmtəə bazarlarında qızılın fyuçers müqavilələrinin qiyməti 1 troya unsiya üçün 5 500 ABŞ dollarını ötüb. Dünya bazarında gümüşün qiyməti də rekord səviyyədə artmaqda davam edir. Hazırda gümüşün fyuçers müqavilələrinin qiyməti 117 dolları keçib və 1 unsiya üçün 120-dollar həddinə yaxınlaşır.
Qızıl və gümüş qiymətlərinin rekord səviyyəyə yüksəlməsi və qiymətli metallar bazarındakı dinamik mühit fonunda “APA-Economics“ Azərbaycanda əlvan və qara metal filizi yataqlarının öyrənilməsi, tədqiqi, kəşfiyyatı, işlənməsi və idarə olunması ilə məşğul olan “AzerGold” QSC-ə sorğu ilə müraciət edib. Sorğuya cavab olaraq, şirkət bazarın indiki durumunu, gələcək perspektivləri və hazırkı şəraitdə görülən tədbirlərlə bağlı öz mövqeyini açıqlayıb.
Onu da əlavə etmək lazımdır ki, “AzerGold” QSC 2019-cu ildən etibarən ilk dəfə olaraq yerli qızıl və gümüş xammalından hazırlanan sikkə və külçələri pərakəndə bazarda satışa təqdim edib. Cəmiyyətin Satış və mübadilə mərkəzi 2021-ci ildən etibarən fəaliyyətə başlayıb.
- “AzerGold” dünya qiymətli metallar bazarındakı mövcud vəziyyəti necə dəyərləndirir?
- Dünya qiymətli metallar bazarında qiymətlərin yüksəlməsi qlobal maliyyə-iqtisadi böhranlar, geosiyasi gərginliklər və ümumi qeyri-müəyyənliklər fonunda ciddi çağırış kimi qiymətləndirilir. Belə şəraitdə qiymət artımı bir tərəfdən qlobal inflyasiyanın dərinləşməsinə, istehsal və maliyyə xərclərinin artmasına, digər tərəfdən isə beynəlxalq bazarlarda volatilliyin güclənməsinə səbəb olur. Bu amillər bir çox sahələr üçün risklər yaratsa da, dağ-mədən sənayesi və xüsusilə qiymətli metal istehsalı ilə məşğul olan şirkətlər üçün yeni imkanlar formalaşdırır. Bu baxımdan, dağ-mədən şirkətləri, o cümlədən “AzerGold” QSC üçün mövcud vəziyyət dinamik və strateji baxımdan əlverişli mərhələ kimi dəyərləndirilir. Mövcud bazar şəraiti “AzerGold” üçün ixrac potensialının genişləndirilməsi və satış gəlirlərinin artırılması baxımından imkanlar yaradır.
- Ümumiyyətlə, 2025-ci ildə şirkət hansı həcmdə qızıl və gümüş satıb?
- Ötən il ərzində dövlət şirkəti beynəlxalq və yerli bazarlarda ümumilikdə 73,2 min unsiya qızıl və 93,2 min unsiya gümüş satışı həyata keçirib. Bu satışlardan əldə olunan ümumi gəlir 439,3 milyon manat təşkil edib ki, bu da 2024-cü illə müqayisədə 43 faiz çoxdur. Fəaliyyətə başladığı dövrdən etibarən mənfəətlə çalışan “AzerGold” QSC ümumilikdə 560,5 min unsiya qızıl və 1,04 milyon unsiya gümüşün satışını həyata keçirərək ölkə iqtisadiyyatına 1,9 milyard manat dəyərində vəsait cəlb edib.
- Şirkət mövcud şəraitdə hansı tədbirləri görür və hansı strategiyaya əməl edir?
- “AzerGold” QSC qlobal bazar konyunkturasını sistemli şəkildə təhlil edərək istehsal, satış və kommersiya strategiyasını beynəlxalq trendlərə uyğunlaşdırır, eyni zamanda dağ-mədən layihələri üzrə portfelinin şaxələndirilməsi və beynəlxalq bazarlarda mövqelərinin möhkəmləndirilməsi istiqamətində ardıcıl və məqsədyönlü fəaliyyətini davam etdirir.
Qızılın və digər qiymətli metalların qiymətinin artması fonunda beynəlxalq investorların dağ-mədən sənayesinə marağı əhəmiyyətli dərəcədə yüksəlir. İnvestorlar bu sahəni qlobal inflyasiya və maliyyə riskləri şəraitində daha dayanıqlı və etibarlı investisiya istiqaməti kimi görürlər.
Dövlətin strateji baxışının və resursların səmərəli istifadəsinə yönəlmiş uğurlu siyasətinin tərkib hissəsi olaraq, “AzerGold” QSC tərəfindən Qarabağ və Şərqi Zəngəzur iqtisadi rayonları da daxil olmaqla, ölkəmizin digər ərazilərini əhatə edən filiz yataqları və mineral təzahür sahələri üzrə geoloji kəşfiyyat proqramı icra edilir. Bu proqramın əsas missiyalarından biri dağ-mədən sahəsinə potensial investorların cəlb edilməsidir. Bu məqsədlə müasir tədqiqat metodlarının tətbiqi ilə yeni perspektivli mineral-xammal potensialının müəyyənləşdirilməsi, mövcud yataqlarda ehtiyatların yenidən qiymətləndirilməsi istiqamətində intensiv işlər görülür.
- Daxili pərakəndə bazarda vəziyyət necədir, xüsusən də “AzerGold”un təqdim etdiyi məhsullar üzrə?
- Bildiyiniz kimi, “AzerGold” QSC 2019-cu ildən etibarən yerli pərakəndə bazara qızıl və gümüşdən hazırlanan, maddi dəyərlə yanaşı, mənəvi və simvolik mənalar daşıyan geniş məhsul portfeli - sikkələr və külçələr təqdim edir.
“Made in Azerbaijan” brendini təşviqinə xidmət edən bu məhsullar ötən dövr ərzində yerli bazarda kifayət qədər maraq doğurub, xüsusilə də hədiyyə seçimi kimi daha çox üstünlük verilən sikkə məhsulları milli kimliyi əks etdirməsi, eləcə də estetik baxımdan yüksək səviyyədə hazırlanması ilə böyük rəğbət qazanıb.
Külçə məhsullarına gəlincə isə, 1 qramdan – 1 kiloqramadək çəkilərdə hazırlanan, keyfiyyət sertifikatı ilə təmin edilən məhsullarımız yerli pərakəndə bazarda tələbatlı, sərfəli investisiya aləti kimi mövqe tutub. Cəmiyyətin tətbiq etdiyi gerialış mexanizmi isə sözügedən məhsulların likvidlik imkanlarını bir qədər də genişləndirərək davamlı tələbatı artırıb. Əlavə olaraq, qızılın qiymətində müşahidə olunan artım mövcud tələbatın daha da artmasına səbəb olub.
Belə ki, 2025-ci il üzrə qızıl məhsullarının satış həcmi 2024-cü illə müqayisədə 39%, gümüş məhsullarının satış həcmi isə 170% artıb. Ümumilikdə, 2025-ci ildə pərakəndə satışdan əldə edilən gəlir əvvəlki illə müqayisədə 103% artaraq 41,2 mln. manat təşkil edib.
- “AzerGold” dünya bazarındakı qiymət dəyişikliklərinə uyğun olaraq öz məhsullarının qiymətini necə tənzimləyir?
- “AzerGold” QSC-nin alıcılara təqdim etdiyi qızıl məhsulları metalın dünya birjasındakı cari qiymətinə uyğun olaraq, xərclər üzərinə minimal marja əlavə edilməklə formalaşan qiymətlərlə satışa çıxarılır. Cəmiyyətin qiymət siyasətinə uyğun olaraq, satış qiymətləri məzənnə və qlobal bazar dəyişikliklərinə adekvat şəkildə mütəmadi yenilənir ki, bu da qiymətlərin şəffaf, çevik və bazar prinsiplərinə uyğun formalaşmasını təmin edir.
- Hazırda sizin məhsullarınız üzrə 1 qram qızılın orta qiyməti nə qədərdir?
- Hazırda qızıl külçələr üzrə (işçilik və əlaqəli xərclər daxil olmaqla) 1 qramın orta satış qiyməti təxminən 320 manat, qızıl sikkələr üzrə isə (işçilik və əlaqəli xərclər daxil olmaqla) təxminən 330 manat təşkil edir.
