ABŞ prezidenti Donald Tramp Venesuela hava məkanının kommersiya uçuşları üçün yenidən açılacağını və amerikalıların artıq ölkəyə "təhlükəsiz" səyahət edə biləcəklərini bildirib.
Ağ Evdə keçirilən 2026-cı ilin ilk kabinet iclasında ABŞ Prezidenti Tramp Venesueladakı mövcud vəziyyətlə bağlı açıqlama verib. Tramp Venesuelanın müvəqqəti prezidenti Delsi Rodrigezə istinad edərək dedi: "Mən indicə Venesuela prezidenti ilə danışdım və ona Venesuela üzərindəki bütün kommersiya hava məkanını açacağımızı bildirdim".

O, ABŞ Nəqliyyat Departamentinə və hərbçilərə Venesuela hava məkanını mümkün qədər tez kommersiya uçuşları üçün açmağı tapşırdığını qeyd edərək, amerikalıların artıq Venesuelaya səyahət edə və "orada təhlükəsiz ola" biləcəklərini əlavə etdi.

Tramp həmçinin ABŞ-ın əsas neft şirkətlərinin artıq layihələri üçün yer seçmək üçün Venesuelaya getdiyini və nəticədə əldə edilən iqtisadi qazancların həm ABŞ-a, həm də Venesuelaya "böyük sərvət" gətirəcəyini bildirdi.

aia.az
Tərcümə şöbəsi