Ukrayna üzrə sülh danışıqları fonunda Ankaranın Qara dəniz regionunda mümkün rolu Brüssel üçün strateji əhəmiyyət qazanır...
Poliqon xəbər verir ki, Avropa İttifaqı (Aİ) Ukrayna ətrafında gedən sülh danışıqlarının intensivləşməsi fonunda Türkiyə ilə münasibətləri bərpa etməyə və gücləndirməyə çalışır. Brüsseldə hesab olunur ki, münaqişədən sonrakı mərhələdə Türkiyə xüsusilə sülhməramlı missiyalar və Qara dəniz regionunda təsir imkanları baxımından mühüm tərəfdaş ola bilər.
Məlumata görə, Aİ-nin genişlənmə məsələləri üzrə komissarı Marta Kos bu məqsədlə Türkiyəyə rəsmi səfərə yollanır. Səfərin əsas məqsədlərindən biri tərəflər arasında son illərdə zəifləyən siyasi dialoqu bərpa etmək və əməkdaşlıq istiqamətlərini yenidən müəyyənləşdirməkdir.
Marta Kos səfər ərəfəsində Politico nəşrinə açıqlamasında bildirib ki, Ukraynada mümkün sülh razılaşması Avropada geosiyasi reallıqları ciddi şəkildə dəyişəcək. Onun sözlərinə görə, bu dəyişikliklər xüsusilə Qara dəniz regionunda təhlükəsizlik balansına təsir göstərəcək və bu kontekstdə Türkiyə Aİ üçün vacib strateji tərəfdaş rolunu oynayacaq.
Aİ rəsmiləri hesab edirlər ki, Türkiyə həm regional hərbi-siyasi təsir imkanları, həm də Ukrayna münaqişəsi dövründə vasitəçilik təşəbbüsləri ilə mühüm aktor kimi çıxış edir. Bundan əlavə, Ankara Qara dənizdə təhlükəsizlik məsələləri, enerji marşrutları və logistika xətləri baxımından da Avropa üçün mühüm mövqeyə malikdir.
Analitiklər qeyd edirlər ki, Aİ ilə Türkiyə arasında münasibətlər son illərdə bir sıra siyasi fikir ayrılıqları səbəbindən gərginləşsə də, Ukrayna müharibəsi və regional təhlükəsizlik məsələləri tərəfləri yenidən əməkdaşlığa sövq edir. Ekspertlərin fikrincə, Brüssel Ankaranı təkcə hərbi-siyasi tərəfdaş kimi deyil, həm də regional sabitliyin təmin olunmasında vacib diplomatik platforma kimi qiymətləndirir.
Poliqon.info
