Nyu-York meri Zohran Mamdani ABŞ İmmiqrasiya və Gömrük Mühafizəsi (ICE) bölmələrinin qeyri-qanuni miqrantları saxlamaq məqsədilə şəhər hüdudları daxilində bələdiyyəyə məxsus mülklərdə keçirəcəyi əməliyyatları məhdudlaşdıran fərman imzalayıb.
Mamdani müxtəlif dinlərin nümayəndələrinin bir araya gəldiyi səhər yeməyi tədbirində Nyu-York bələdiyyəsinin obyektlərinə qarşı ICE polisinin əməliyyatlarını məhdudlaşdıran qərarı elan edib.
Bu fərmanı şəhərdə yaşayan miqrant icmalarına, məxfiliyin qorunmasına və ictimai təhlükəsizliyə sadiqliyinin geniş təsdiqi kimi xarakterizə edən Mamdani "Mən təkcə miqrant nyu-yorklularımızı deyil, həm də bütün şəhər sakinlərini sui-istifadə edilən immiqrasiya təcrübələrindən qoruyacaq bir fərman imzalayıram", – deyə bildirib.
"ICE-nin məhkəmə qərarı olmadan Nyu-York şəhərinin mülklərinə daxil ola bilməyəcəyini açıq şəkildə bildirəcəyik" – deyən mer, bu tədbirin hüquqi statusundan asılı olmayaraq sakinlərin şəhər xidmətlərindən istifadə edərkən özlərini təhlükəsiz hiss etmələrini təmin etmək məqsədi daşıdığını vurğulayıb.
Fərmana əsasən, bundan sonra ICE polisi Nyu-Yorkda məktəblər, sığınacaqlar, xəstəxanalar və avtodayanacaqlar da daxil olmaqla, bələdiyyə tərəfindən idarə olunan obyektlərə qeyri-qanuni miqrantları saxlama bəhanəsi ilə birbaşa giriş hüququna malik olmayacaq.
Mədinəyə hicrət edən Həzrəti Məhəmməddən nümunə gətirdi
Nyu-Yorkun müsəlman meri Mamdani ICE polisinin saxlanılma əməliyyatlarını məhdudlaşdıran fərmanını müdafiə edərkən ABŞ-ın miqrasiya siyasətində İslam peyğəmbəri Həzrəti Məhəmmədi nümunə götürməli olduğunu söyləyib.
"Öz inancım olan İslamı miqrasiya hekayəsi üzərində qurulmuş bir din kimi görürəm" ifadəsini işlədən Mamdani, gücün sevmək, qucaqlamaq və qorumaq üçün istifadə edildiyi yeni bələdiyyəçilik anlayışı yaratmağı təklif edib.
Mamdani "Hicrət hekayəsi bizə Peyğəmbərimiz Həzrəti Məhəmmədin də bir qərib olduğunu, Məkkəni tərk etmək məcburiyyətində qaldığını və Mədinədə xoş qarşılandığını anladır. Əgər inanc bizə qəribin yanında durmaq üçün mənəvi kompas təqdim edirsə, hökumət də lazımi resursları təmin edə bilər", – deyə vəziyyəti qiymətləndirib.
