Astronomiya dünyası 13 yanvar 2026-cı ildə kəşf edilən yeni "qonaq" üçün həyəcanlıdır. Atakama səhrasındakı uzaqdan idarə olunan teleskop vasitəsilə təsbit edilən C/2026 A1 (MAPS) kometi aprel ayının əvvəlində Günəşin çox yaxınlığından keçəcək.
Bu səma cismi tarixin ən möhtəşəm kometlərini özündə birləşdirən "Kreutz" ailəsinin üzvüdür. Bu ailə minlərlə il əvvəl nəhəng bir ana kütlədən qopan hissələrdən ibarətdir. MAPS kometi aprel ayının əvvəlində Günəş səthinə cəmi 120 min kilometr məsafəyə qədər yaxınlaşacaq.
"Günəşə toxunanlar" (sungrazers) adlandırılan bu qrupdakı kometlər Günəşin nəhəng istiliyinə məruz qaldıqda ya tamamilə buxarlanır, ya da inanılmaz bir parlaqlığa çataraq vizual ziyafət təqdim edirlər. Əgər MAPS bu təhlükəli keçiddən sağ çıxmağı bacarsa, aprelin ortalarına doğru axşam səmasında unudulmaz mənzərə yarada bilər.
Gündüz vaxtı görünə bilərmi?
Hətta elm adamları Günəşə ən yaxın olduğu anlarda kometin gündüz vaxtı, çılpaq gözlə belə seçiləcək qədər parlamasını ehtimal daxilində görürlər. Bu kəşfi xüsusi edən digər bir detal isə MAPS-in kəşf edilmə məsafəsidir. İndiyə qədər aşkar edilən bütün "sungrazer" tipli kometlər arasında bu, Günəşdən ən uzaq məsafədə fərq edilən parça olub.
Bu vəziyyət MAPS-in adət olunandan daha böyük bir buz kütləsi ola biləcəyinə işarə edir. Trayektoriyasına görə, bu səma hadisəsi Cənub yarımkürəsindən daha aydın izləniləcək. Lakin SOHO kosmik aparatı keçid zamanı dünyanın hər yerindən təqib edilə biləcək yüksək keyfiyyətli görüntüləri anlıq olaraq paylaşacaq.
