Ermənistanda keçiriləcək parlament seçkilərində Ermənistan vətəndaşları öz səyləri ilə və itkilər bahasına qurduqları sülh uğrunda ayağa qalxmalıdırlar.
Herbiand.az xəbər verir ki, bunu Ermənistanın Baş naziri Nikol Paşinyan İctimai Televiziyaya verdiyi müsahibədə bildirib.
“Biz artıq bu gün sülhün nə olduğunu göstərə bilərik. Biz başa düşürük ki, bu dünya mükəmməl deyil, amma sülh olan yerdə rifah, azadlıq və xoşbəxtlik var. Bu gün və keçmişdə baş verənlər o deməkdir ki, Ermənistan fiziki olaraq həmişə olduğu yerdə qalır və gözümüzün qarşısında hamımızın birgə səyləri sayəsində periferiyadan mərkəzə dönür. Qarşıdan gələn seçkilərdə Ermənistan vətəndaşı ilk növbədə öz səyləri ilə, çətinliklər və itkilər bahasına əldə edilən sülh uğrunda ayağa qalxmalıdır. Bütün həlak olanlarımıza səmimi minnətdarlığımı bildirmək istəyirəm və Ermənistan vətəndaşı bu sülh uğrunda ayağa qalxmalı, dünyanın periferiyasından dünyanın mərkəzinə keçid prosesində ayağa qalxmalıdır”.
Nikol Paşinyan qarşıdan gələn seçkilərin təkcə siyasi deyil, həm də tarixi bir seçim olduğunu vurğulayıb:
“Biz tarixi bir seçim etməliyik. 2018-ci ildə millətimizin tarixində məlum və təkrarlanan dövrlərin qırılması barədə danışdığım an gəldi. Bu dövrlərdə geosiyasi şəraitə görə, çox vaxt nəzarətimizdən kənarda, bir dövlət qazanırıq və sonra yenə də nəzarətimizdən kənar vəziyyətlərə görə həmin dövləti itiririk. Bu dövrü qapatmaq imkanımız var. Dövlətimizin davamlı inkişaf gündəliyinə diqqət yetirmək üçün ilk addımlar artıq atılıb”.
