ABŞ Prezidenti Donald Tramp Ağ Evdə İsrailin Baş naziri Benyamin Netanyahu ilə görüş keçirib. Görüşdə İranla bağlı danışıqlar, Qəzza zolağındakı vəziyyət və regiondakı son proseslər müzakirə olunub.
Vətəninfo.az xəbər verir ki, prezident Tramp görüşün başa çatdığını bildirərək iki ölkə arasında münasibətlərin yüksək səviyyədə davam etdiyini vurğulayıb.
“İsrail Baş naziri Netanyahu və onun nümayəndə heyəti ilə görüşü yenicə başa vurdum. Çox yaxşı görüş idi və iki ölkəmiz arasında əla münasibətlər davam edir. Razılaşmanın mümkün olub-olmadığını görmək üçün İranla danışıqları davam etdirməkdə israr etməyimdən başqa heç bir qəti nəticə əldə edilmədi. Əgər bu mümkün olsaydı, Baş nazirə bunun üstünlük verilən seçim olacağını açıq şəkildə bildirdim. Əks təqdirdə, nəticənin necə olacağını görəcəyik”, – deyə Tramp bildirib.
ABŞ prezidenti qeyd edib ki, İran əvvəllər razılaşmadan imtina edib və bunun nəticələri ilə üzləşib. O, Tehranın bu dəfə daha “ağlabatan və məsuliyyətli” qərar verəcəyinə ümid etdiyini ifadə edib.
Tərəflər həmçinin Qəzza zolağındakı vəziyyəti və ümumilikdə Yaxın Şərqdə baş verən prosesləri müzakirə ediblər. Tramp regionda “əhəmiyyətli irəliləyişlər” əldə olunduğunu və Yaxın Şərqə sülhün qayıtdığını bildirib.
Qeyd edək ki, görüşdə əsas diqqət İranla mümkün razılaşma perspektivlərinə və Qəzza ilə bağlı vəziyyətə yönəlib.
