ain.az xəbər verir, Bizimyol saytına əsaslanaraq.
Qazaxıstanın yeni dərc olunmuş Konstitusiya layihəsi ölkənin hazırkı prezidenti Kasım-Jomart Tokayevin səlahiyyət müddəti ilə bağlı mübahisələrə son qoyur.
Bizimyol.info xəbər verir ki, bu barədə qazaxıstanlı politoloq Daniyar Aşimabayev "Telegram" kanalında yazıb.
"Dərc olunmuş layihə hazırkı prezidentin səlahiyyət müddəti məsələsini həll edir. Qasım-Jomart Tokayev 2029-cu ilin noyabr ayına qədər - üç il doqquz ay prezident vəzifəsini icra edəcək. Bu, onun 20 noyabr 2022-ci ildə seçildiyi müddətin yarısından çoxdur", - deyə politoloq qeyd edib.
Aşimabayev vurğulayıb ki, birincisi, gözlənildiyi kimi, növbəti prezident seçkilərinin dekabrın ilk bazar günü keçirilməsini nəzərdə tutan norma layihədən çıxarılıb. Bu norma nəzəri olaraq hazırkı müddətin təxminən 11 ay azalmasına səbəb ola bilərdi. İkincisi, prezident bir dəfəlik 7 illik müddət normasını dəyişməmək barədə öhdəliyinə sadiq qalıb.
Cümə axşamı "Kazakhstanskaya Pravda" qəzeti 15 martda referenduma təqdim ediləcək Qazaxıstan üçün yeni konstitusiya layihəsini dərc edib. Yeni konstitusiyanın mətnində, digər məsələlərlə yanaşı, Qazaxıstan prezidentinin təkrar seçilmək hüququ olmadan yeddi illik müddətə seçildiyi mövcud konstitusiyanın müddəası da saxlanılır. Yeni layihədə həmçinin mövcud konstitusiyanın "respublikanın növbəti prezident seçkilərinin dekabrın ilk bazar günü keçirilməsi" müddəası da istisna olunur. Yeni versiyaya görə, "Qazaxıstan Respublikasının növbəti prezident seçkiləri onun səlahiyyət müddətinin bitməsinə ən geci iki ay qalmış keçirilməlidir".
2022-ci ilin sentyabrında Tokayev dövlət başçısının səlahiyyət müddətini təkrar seçilmək hüququ olmadan yeddi illə məhdudlaşdıran konstitusiya dəyişikliklərini təsdiqləyib. Dəyişikliklər bu müddəanın qüvvəyə minməsindən sonra prezident seçkilərinin qaliblərinə şamil ediləcək. 2022-ci ilin noyabr ayında respublikada növbədənkənar prezident seçkiləri keçirilib və Tokayev səslərin 81%-dən çoxunu qazanıb.
Qazaxıstanın yeni konstitusiya layihəsi ilə bağlı ümumxalq referendumu martın 15-də keçiriləcək. Bir sual veriləcək: "Layihəsi 12 fevral 2026-cı ildə mediada dərc olunmuş Qazaxıstan Respublikasının yeni konstitusiyasını qəbul edirsinizmi?"
Qadir, Bizimyol.info
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
