Azərbaycanda əlilliyi müəyyən edilmiş daha bir qrup şəxsə və şəhid ailələrinə yeni mənzillər veriləcək.
Hafta.az bildirir ki, Əmək və Əhalinin Sosial Müdafiəsi Nazirliyi tabeliyində fəaliyyət göstərən Sosial Xidmətlər Agentliyi bununla bağlı müvafiq hazırlıq işlərinə başlayıb.
Həyata keçirilən tədbirlərin davamı olaraq, sözügedən kateqoriyaya aid şəxslər üçün Salyan rayonunda 9 ədəd ikiotaqlı və 6 ədəd üçotaqlı mənzilin verilməsi nəzərdə tutulur.
Məlumata əsasən, əlilliyi müəyyən olunmuş şəxslərə və şəhid ailələrinə təqdim ediləcək həmin mənzillərin satın alınmasına təxminən 1,2 milyon manat vəsaitin sərf olunacağı proqnozlaşdırılır.
Xatırladaq ki, Azərbaycanın ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlilliyi müəyyən edilmiş şəxslərin və şəhid ailələrinin sosial-məişət şəraitinin yaxşılaşdırılması dövlətin əsas prioritetlərindəndir. Azərbaycan dövləti bu kateqoriyadan olan vətəndaşların sosial rifahının yüksəldilməsi, mənzil-məişət şəraitinin yaxşılaşdırılması istiqamətində ardıcıl və məqsədyönlü tədbirlər həyata keçirir. Bu istiqamətdə həyata keçirilən tədbirlər mütəmadi olaraq, mərhələli şəkildə davam etdirilir. Bu diqqət və qayğının nəticəsi olaraq, indiyədək xeyli sayda ailə yeni mənzillərlə təmin olunub./iqtisadiyyat/
