Bakı Apellyasiya Məhkəməsində yol qəzası törətməkdə təqsirləndirilən Yusif Talıbovun (adı və soyadı şərtidir) barəsindəki hökmdən verilən apellyasiya şikayəti üzrə məhkəmə prosesi başa çatıb.
Pravda.az-ın əldə etdiyi məlumata görə, sonuncu keçirilən prosesdə qərar elan edilib.
Qərara əsasən, apellyasiya şikayəti təmin edilməyib, Xətai Rayon Məhkəməsinin hökmü dəyişdirilib, təqsirləndirilən şəxs barəsində “Konstitusiya və Suverenlik İli” münasibətilə amnistiya elan edilməsi haqqında Milli Məclisin qərarı tətbiq olunub, ona təyin edilmiş azadlıqdan məhrumetmə cəzasından azad edilib. Yusif Talıbov barəsində seçilmiş başqa yerə getməmək barədə iltizam qətimkan tədbiri ləğv edilib.
İttihama görə, Yusif Talıbov sürücülük vəsiqəsi ilə özünə məxsus, texniki cəhətdən saz vəziyyətdə olan “Toyota Corolla” markalı avtomobili 26 sentyabr 2024-cü il tarixdə, saat 10:40 radələrində Bakı şəhəri, Xətai rayonu, 8 Noyabr prospekti ilə “Nargilə” dairəsi istiqamətində saatda təxminən 55–60 km/saat sürətlə idarə edib.
Araşdırma zamanı müəyyən olunub ki, sürücü qanunun tələblərini pozaraq, yəni hərəkət üçün təhlükənin yarandığını gördükdə nəqliyyat vasitəsinin sürətini tam dayanma həddinədək azaltmaq üçün mümkün olan tədbirləri görməli olduğu halda, qanunun bu tələbini yerinə yetirməyib. Belə ki, hadisə yerində yolu soldan sağa iti yerişlə keçən piyada Sahib Məmmədovun hərəkət trayektoriyasını görməsinə və yol-nəqliyyat hadisəsinin qarşısını almağa texniki imkanı olmasına baxmayaraq, sürücü tərəfindən sürətin azaldılması və ya nəqliyyat vasitəsinin dayandırılması istiqamətində hər hansı təsirli tədbir görülməyib. Nəticədə Yusif idarə etdiyi avtomobilin qabaq sol hissəsi ilə piyadanı vuraraq, ona ehtiyatsızlıqdan çoxsaylı ağır bədən xəsarətləri yetirib. Zərərçəkmiş Sahib Məmmədovun aldığı ağır küt travmanın təsiri nəticəsində yaranmış kəskin və çoxlu qan itirmə ilə birbaşa səbəbli əlaqədə olub. Beləliklə, yol-nəqliyyat hadisəsi nəticəsində zərərçəkmiş şəxsin ölümü baş verib.
Xətai Rayon Məhkəməsinin hökmü ilə təqsirləndirilən şəxs təqsirli bilinərək 3 il 6 ay müddətə azadlıqdan məhrumetmə cəzasına məhkum edilib.
Kamal Məmmədov
