İtaliya hakimiyyəti Ukrayna münaqişəsinin nizamlanması məqsədilə Cenevrədə keçiriləcək danışıqlarda iştirak etmək üçün yola düşən Rusiya nümayəndə heyətinin uçuşuna icazə verib.
AFN.az xəbər verir ki, aviauçuşların monitorinqi kanallarının məlumatına görə, Rusiya Prezidentinin köməkçisi Vladimir Medinskinin rəhbərlik etdiyi heyəti daşıyan təyyarə artıq İtaliyanın hava məkanına daxil olub. Moskva–Cenevrə marşrutu üzrə uçuşun ümumilikdə təxminən doqquz saat davam edəcəyi bildirilir.
Fevralın 17-18-də Cenevrədə baş tutacaq bu görüşlərdə tərəflər sülh prosesi üçün çərçivə prinsiplərini razılaşdırmağa çalışacaqlar. Bu məsləhətləşmələr yanvar və fevral aylarında Əbu-Dabidə keçirilmiş üçtərəfli müzakirələrin davamı hesab olunur.
Danışıqlarda 20-dən çox mütəxəssisin iştirakı gözlənilir. ABŞ tərəfini isə görüşdə prezidentin xüsusi elçisi Stiven Uitkoff və iş adamı Cared Kuşner təmsil edəcək.
